HINUGYAW ( 3 ) Tanagakeanon ni Ati-Ati

HINUGYAW ( 3 )

Tanagakeanon ni Ati-Ati

_________________________________

HALA BIRA

1.

Akon ginhuna-huna

Protoro’t mga unga

Siin baea matugpa

Sa eangit o sa eugta?

2.

Karsadang matsa humbak

Motor ko eumagasak

Bumalilin sa eubak

Nadugangan ang pae-ak.

3.

Maeamig nga einugaw

Maskin may bahaw-bahaw

Sa kaeamay ginsawsaw

Ag amon ginpamahaw.

4.

Mga tawo gatingha

Bangud owa it suea

Mga isda sa suba

Ubos loader it sungka.

5.

Mga tawo nahadlok

Basi kon tumabusok

Sa tulay eon nga gabok

Puro anay ag bukbok.

6.

Owa gasakang sweldo

It pobreng mga tawo

Apang ro pulitiko

Gaeapaw ro asenso.

7.

Owa’t untat nga uean

Suba nga basurahan

Eapaw sa kaeugtaan

Eumunod sa katawhan.

8.

Pag-agto ko sa tabok

Ako hay tumabusok

Sa buho ng sinandok

It gaquarry nga sueok.

9.

Payag-payag ni Inday

Sa may binit it baybay

Inagyan it kanaway

Naguba ag humapay.

10.

Relief goods ginpanagtag

Mga tawo gakupag

Kueang eon sa plastic bag

Ubos ukay ag haghag.

11.

Ro akong kaeanasan

Owa gid it mapuslan

Tubing ginasaligan

Sa kanae hay namaehan.

12.

Ro amon nga pamahaw

Hay kapaya nga hilaw

Sa mahaeang nga eanggaw

Sinawsaw ag kinilaw.