MAWRA KADA GABII
Nakaplastar eon ro lamisa,
May nagdaeagan eon man sa baraka;
Ginabagay eon ro gitara,
Agud ro jamming hay hasta maaga.
Maeamig ro kagab-ihon, ro tyempo hay matawhay,
Manami magtagay, maskin sumsuman hay eaway;
Redhorse, emperador, o kon owa eon gid hay tanduay,
Basta ro barkada, diretso ro kalipay.
--------------------------------------------------
INDYAN MINGGO
Buyug pa ngani hay ginahambarong,
Indi pa kuntento, masaka sa tuyung -tuyong;
Kon indi maabot hay kuhiton dayon,
Pagkabuyot hay insigida angkiton.
Indi pag-untatan kapin pa kon habae,
Sige ro usang maskin ginabaebae;
Pag- euto nga mayad hueaton madagas,
Mananam kaunon kapin pa eab-as.
Makaron ro panyempuhon it hara nga kaean-on,
Idian mango nagakalhit, bisan siing karsadahon;
Hinay-hinay eang it kaon, basi ro tiyan hay kumutoy,
Diretso dayon sa kasilyas, ag idto magpauy-uy.
____________________
SUBA FOR LIFE
Ipreparar ro bunit nga pagadaehon,
Tipunon ro eago nga pang paun;
Maagto kita sa suba, malieon
Agud makasirtar it ubog nga bahoeon.
Maeunip sa idaeom it euka,
Mamidyu it sili nga naka nganga;
Ro ueang hay ginaeampasan pa,
Pero kon owa eon gid hay sikpun ta.
Pag- abot it gabii hay manueo,
Ro mga kalampay hay gadinaguso;
Kuuton bisan ano nga buho,
Pagpueot it bangsud hay indi kasahu
Aton nga hipigan ro atong suba,
Dahil sa mga kaean-on imaw hay bugana;
Indi naton pag malitan, indi magpabaya,
Agud may matu-ipan pa mga ulihing inunga.
_______________________
BAYLE PARA SA TANAN
Ginplastar eon ro iwag ag sound system,
Sige eon eaha it basket kanday Laling;
May panawagan ro atong barangay captain,
"Tanan hay gina imbetar sa plasa dis ebning. "
Nagdinaguso pagtukar it sonata
May ina man nga gusto hay cha-cha,
Pirte ro screen sa kursunadang daeaga,
Agud pagka request it sweet hay sautan nanda.
"Pahuway anay kita" hambae it manugbaligya,
"Panganay nga basket aton anay isubasta;
Syen pisos kuno paghalin sa lamisa,
Temprano pa ro oras, ibutang ta sa ala-una"
Ro ibang miron hay may ginatigan-an,
Nagasalida sa mga kadaeagahan;
Ro mga sinsilyo hay pinahaum eon man,
Agud sa glass dance may anang makuutan.
M,alieon kita tanan sa binayle,
Maabong kangay, nagaka sari-sari;
Eaki, bayi, bisan tumboy o agi hay puydi,
Pati man mga ginikanan may hayga mag-balsi.
_______________________
BUEANGAN BLUES
Aysko! aysko! singgit it mga kristo,
Si Tito Berns sige ro tawag sanglibo ro imo;
Ro dirasang bangkas sobra nga liyamado,
Mga paeasaeod gaduha-duha it piniino.
Ro logro hay nagpanaba pa, bayntsi ag dyesti,
Kon wa pa't gasae, maskin tinunga eon puydi;
Ro daywa ka manok ginplastar eon sa prenti,
Kon imo tan-awon, mestiso nga biya dali eagi mapirde.
Pagbuhi sa royda bangkas eagi ro umatraka,
Pirte kumikig, kon humanot todo pwersa;
Pero sumabay man ro biya, nakibot ro dagaya,
Baeaebaean sa ere hasta sa pagtugpa.
May bueang nga umungot, abtik ro manugkariyo,
Pagbueag it manok may lumuyloy nga ueo;
Ro dirasa nga bangkas may sikreto gali nga igo,
Naghinugyaw ag nagkalingaw mga dehadistang tawo.
Makaron gid man sa bueangan may malas ag swerti,
May gauli nga daog pero eaban gid hay pirdi;
Ro iba mat-a hay kuntento eon sa baeon nga sangkiri,
Basta may Merkon's special siopao sa anda nga pag uli.
________________________
PAALIN EON KITA?
Abu eon nga nagakinatabo,
Nagakupag eon mga pumoueoyo;
Sa mga kalamidad kunta hay pahilayo,
Agud indi kita magkinasubo.
May linog nga kabaskug ta,
Dugangan it ginahambae nga tsunami pa;
Sa ibang nasyon hay may gyera,
Iya sa aton gaandam man ro baha.
Kon sa Japan may nuclear radiation sa air,
Iya sa aton man hay may text scare;
Ubra it mga tawo nga owa it care,
Mag panic man ro iba, owa sanda it kiber.
Hay paalin lang kita kara?
Paalin ro atong mga inunga?
Matsa ro katapusan hay gapalapit na,
Parehas it nasueat sa mga propesiya.
Owa kita it iba nga ubrahon,
Kundi ro sangkalibutan atong hipigon;
Ag ro GINUO hay aton nga dumdumon,
Agud kita hay Ana nga utwason.
______________________
MAWRA ANAY KAMI
Ro hampang anay it inunga hay sari-sari,
Bukon pa it uso kato ro computer ag PSP;
Istik, holen, goma, tansan, eamang, ro ana it mga eaki,
Jackstone ag chinese garter mat-a ro hilig it mga bayi.
Pag buean it Abril hasta mag Mayo,
Maagto sa Tul-ang ag mangahoy idto;
Dahil ro Gasul ag Shellane bukon pa it uso,
Ngani bukoe ag pakeang ro usoy it mga tawo.
Kada Sabadong adlaw sa suba hay may pyesta,
Mansig pwesto ro mga nanay sa pageinaba;
Samtang ro mga pamatan-on hay nagakinasadya,
May gapaligos, gapanikop ag gahampang sanda.
Kon makaron hay may TV ag cable,
Radyo mat-a kato ro kauyaktan it pipol;
Sa mga drama hay Matud Nila ro eksampol,
Si Simatar ag Eskalibur ro amon nga aydol.
Nakasirtar man ako it ginahalin nga baeay,
Tanan nga eaki sa pagpas-an hay ginkangay;
Bayahihan ro tawag, ro tag-iya hay nalipay,
Pagkatapos hay may kaean-on ag sangkire nga tagay.
Mawra anay ro naunang panyempo,
Simple ro pangabuhi it mga pumueoyo;
Pero makit-an mo ro tunay nga pagsinaeayo,
Ag pagbueoligan it tagsa-tagsang mga tawo.
- FROI INOG
Laguinbanwa, Ibajay, Aklan
