UEAN/SILAK ( Mga Abtik nga Sugilanon nga Akeanon )

UEAN/SILAK

( Mga Abtik nga Sugilanon nga Akeanon )

HUEAM
ni Shur Conanan Mangilaya

TEMPRANO pa ro gabii kat mag-agto si Nong Tonio sa isaea ka baraka, may kaeayuon pa nana panawon halin sa andang baeay sa may bukid. Kinahangean pa nana nga magtabok it suba antes makaabot sa isaea ka barangay nga may baraka.

            Isaea nana nga problema hay owa imaw it daeang kwarta. Tan-awon nana kon makahueam imaw tungod gabii eon. Ag isaea pa hay owa sanda it suea sa ihapon. Tao eang man kon makautang imaw it de-lata. Ag kapin pa nga may sueod eon hin-aga ro anang unga sa eskuylahan ngani kinahangean gid nana nga makahueam it kwarta, agud pambaeon it anang unga.

            Samitan nana kon makausoy imaw it midyos. Kilaea eon man imaw it tag-iya it baraka, ag kon amat nagautang man imaw. Bisan sayod nana nga ginaluko imaw it tag-iya. Bangud suno sa anang nasayuran, matsa ginataasan ro presyo it baligya kon imaw magbakae. Anda abing pagkasayod kana hay madali eang lukuhon bangud uwa haeos it iniskuylahan. Ag sayod Nana nga may batasan nga maugtason si Nay Maria.

            "Ah, Nang Maria, mayad nga gabii." mueo ni Nong Tonio sa tag- iya.

            "Mayad man nga gabii, ano panaw Ton?" Pangutana ni Nay Maria.

            "Ah, gahinyo kunta ako kon puydi baea ako kahueam kimo it baynte pesos," hinyo ni Nong Tonio.

            "Ano? Mahueam ka nga gabii eon ngara."

            Owa ako gapahueam," sabat it magueang

            "Sige lang Nang a. Puydi mautang lang ako it sambilog nga kornbip?"

            "Puydi man, tag singkwenta sambilog."

            "Sige, sambilog."

            Dinawat it magueang kay Nong Tonio ro cornebeef.

            "Hay tag sardinas ngaron huh, tagpila?" Pangutana ni Nong Tonio.

            "Ah, tag traynta ham-an?"

            "Puydi ko bayluhan ro kornbip ngara it sardinas lang?"

            "Sige, ambi lang ron."

            "Di baea tag singkwenta ro kornbip ngara ag tag traynta ro sardinas?"

            "Huo, ham-an?"

            "Ngani may sag-uli pa ako nga baynte pesos."

            Dinawat it magueang ro sardinas ag baynte pesos kay Nong Tonio.

            Maeayo-eayo eon ro pinanaw ni Nong Tonio kat madumduman nana nga may pambaeon eon nga kwarta sa eskuylahan ro ana nga unga hin-aga. Naghiyum-hiyom imaw samtang ginapanumdom ro maugtasong magueang nga si Nay Maria.

EAHON ni Love Torres

EAHON
ni Love Torres

Sa idaeom it alima it ugsad nga buean
Nagpungko ako sa kagueangan it imong limog
Sa pagduyan-duyan ku mga dahon
Napahutik ako it matam-is nga pagpaseamat
Sa mainit-init nga hulikap it imong paghigugma --
Imortal nga nagakinamang sa huna-huna,
Padayon nga nagatubo sa akong paminsaron,
Kamana it mga maeambo nga hilamunon
Nga ikaw mismo ro nagtanom
Sa kaidaeuman it akong hinumdom.
Ginsaksihan it nagakindat-kindat nga mga bituon
Pagbaeaylohan it atong mga promisa
Kaibahan it kadueom nga nagakupkop sa kagab-ihon
Nagahakos ag nagakurae katon daywa.
Ginhandum ko nga kabay bisan sa harang punto,
Ro pag-einangoy it panganod hay magpundo;
Ro adlaw indi anay magbugtaw
Indi anay magmukeat sa anang kalimutaw,
Bangud katon eang ro harang gabie.
Agawon ko, akuon ko
Aton eang.

- Maloco National High School

Maloco, Ibajay, Aklan

MAESTRO AG MAESTRA Ni Jose Ronald T. Inguillo

MAESTRO AG MAESTRA
Ni Jose Ronald T. Inguillo

Manugturo, nagatindog nga pangaywang ginikanan.
It mga inunga kon idto sa eskuylahan.
May mabahoe ag mabug-at nga katungdanan
Sa aton pag-inugali ag pagtinueon-an.

Manugturo nga nagakahawag kon ikaw hay maeuya.
Problema it estudyante hay problema man nana.
Indi makatueogan kon indi masolusyunan
Ro mga problema idto sa eskuylahan.

Manugturo nga nasubuan kon ro estudyante hay sa kalisdanan.
Sobra man ro kalipay kon ro tanan hay hayahay.
Una nga nakapan-o kon ro ana’ng estudyante hay may gusto
sa ana’ng kaklase hay inlab eon kuno.

Manugturo nga ro tutunlan pirmeng nagasakit.
Sa mga inunga sige ro ana’ng singgit.
Mueay nga estudyante sa manugturo indi magpati
Ngani si maa’m ro kaakig hay pirte.

Mga manugturo nga mga intelihente.
Maid-id nga ginapadpad ro leksyon sa klase.
Ginasigurado nga kada isaea hay nakaintindi
Agod may iuli nga kaaeam ro ana’ng estudyante.

- Jawili, Tangalan, Aklan