RA AKON NGA BARKADA ni Gezelle D. Solidum

RA AKON NGA BARKADA

Hay! Kamusta baea ra atong una nga pag-iba?

Yiieeeeh, manami gid-a baea

Una paeang gali makamaeadla

Hangaeon mong na-guidance kita dahil sa pagpanaw sa pantalan nga

Owa’t eaong sa maestro.

Sunod eoman hay may inuman kita

Di ko eon pag hingaeanan kon siin banda

Nahilong kita sa emperador nga ubra

Hahayy, nagmaoy gid ra langka-langka.

Maabu eot-a ra atong masadya nga inubra

Sinigundahan pa it pag-agto naton sa Habana

Hangaeon mong binalewala ra praktis para eang makamunot

Ay! Basi owa pilahi nagsaot-saot.

Kamo gatao kakon it kaaeam ag kabaskog

Kaaeam sa kalokohan ag kabaskog nga indi magsueod

Pero haron hay akon-akon malang

Syempre sayod n’yo man ako kabubueo mag balang-balang.

Hay harang ga-graduate eot-a kita

Owa pilahi ra inadlaw sa eskuyla

Grabi, makahieidlaw mat-ana

Hay nadumduman ko gid-a ra una naton nga pag-ieiba.

Harang binaeaybay ginhaead ko kinyo

Masyado gid abi akong inspirado

Bisan hara lang may handumanan kamo

Ag kunta dumdumon pa ninyo ako.

ni Gezelle D. Solidum

Si Gezelle D. Solidum hay dati nga estudyante it Melchor Memorial School Inc. sa Brgy. Lguinbanwa, Ibajay, Aklan.

RO AKONG PAGKATAWO ni Padayon Akeanon

RO AKONG PAGKATAWO

Sudla ro akong kaugalingon

Kon gusto mo nga busikaron

Ro akong madaeom nga pagkatawo.

Eunipa ro akong malimpyo nga tagipusuon

Ag tungkaron ro akong baeatyagon.

Halikapa ro akong painu-ino

Ag hameuson ro akong huna-huna.

Hiluta ro mga ugat ko ag unod

Ag sumil-ot sa akong mga tue-an.

Eumangoy-eangoy sa akong hamili nga dugo

Ag magpaanod sa ginhawa it akong kabuhi.

Kumapyot sa akong nagaeutaw-eutaw nga kaeag

Ag humakos sa akong eangitnon nga espirito.

ni Padayon Akeanon

Si Padayon Akeanon hay tumandok nga Akeanon nga naga istar sa binit it suba ag kilid it kaeanasan sa Aklan

SEKSYON NAMON RA ni Gezelle D. Solidum

SEKSYON NAMON RA

Harang seksyon owa gid it makaperdi

Ginatawag eani kami it ibang estudyante nga perti

Grabi gid abi ro amon na kalipayan

Iya namon ron nakita sa eskuylahan.

Pag-abot sa classroom pilakon ra bag ag unahon ra chismisan

Miskan magkaiping hala sige singgitan

Kapin gid ra istorya parti sa paghigugma

Ay! Indi eon it ngawa kon ham-an kami makara.

Umpisahan mo eang eani it hinilik-ik

Ay haron eon dayon sunod-sunod ra mga tiktik

Kon makahibayag paman makahaeawa sa tanan

Kita mo gid pati ra gaipli natapnan it aeang-aeang.

Da-best gid-a ra seksyon namon ngara

Naubra pang mag partisipar pag-abot sa binastos nga istorya

Kapin unahan ron ni sir Saluta

Ay siguradong bangkahan gid ron ni Mae Fe ag Cynthia.

Pag-abot man abi it subject ni Mam Violeta

Haron eon ra mga baba gahara-hara

Sayod n’yo guys nga manaw-ayon si mam sa masangag

Ay! Basi matsa owa man lang kita kabatyag.

Kon kita eani hay anang tur-an

Abaw! Pasimple eang nga may naeubtan

Pag magpangutana ngani imaw kon ano to?

Sabat eang dayon “ SORRY MAM NALIPAT EON AKO “

Sa klase man abi ni Sir de Jose

Matueok anay kay Sandoval ag Franco para magngisi

Grabi gid-a gali ra karisma it seksyon Molave

Umpisa sa ueo hasta sa siki.

Imaw man kon kay Mam Annie

Pagtungtong sa classroom ga pormal kami

Magpungko it tadlong ag magpamati

Hay may kahadlukan man gali kitang Molave.

Pag-abot man sa English nga topiko

Tanan nga Molave manami it ueo

Sunod abi karon hay kagana nga recess

Daywang subject lang bago mag-dismiss.

Kon sa subject man ni Mam Susan ra istoryahan

Owa gid-a si Mam it nahimo sa among kalipayan

Ra iba abi nakon nga klasmeyt ga basa it pocketbook

Ra iba mat-ana ga Bluetooth-bluetooth eang it e-book.

Kon kami man mag-uli halin sa eskuylahan

Panigurado amon gid ra aeagyan

Kon ra trip man hay abangan ra saeakyan

Owa gid-a it huya miskan gina hinibaygan.

Masyado gid-a kita nga maaeam pag-abot sa kalokohan

Imong ginaeaom nga seryoso, mayad man gali sa kalango-langohan

Pati ngani ra mahipos nakisabay man pag-abot sa kabulastugan

Hay! Seksyon Molave, nahidlaw gid ang soon to be.

Harang gapatapos eon ang istorya

Madumduman n’yo pa kunta ra kada isaea

Kitang seksyon ra pinakamasadya

Owa’t makaperdi sa manami nga pag-ieiba.

VIVA SEKSYON MOLAVE BATCH 2013-2014 !!!

ni Gezelle D. Solidum

        Si Gezelle D. Solidum hay nagaistar sa Brgy. Laguinbanwa, Ibajay, Aklan

NANAY AG TATAY ni Jasmin Calizo-Vargas

NANAY AG TATAY

Naila gid ako ay may kumpleto akong pamilya

Una si Tatay ag Nanay nga kaibahan nakon

Sa adlaw hay puro kami masako sa among obligasyon

Pero pag abot it kagab-ihon kami hay nagatipon.

Indi gid maduea sa among pag-ihapon

Ro mga istorya it mga nagkaeatabo kamon

Sa sang adlaw sa among mga hilikuton

Ginasugid gid ro kada detalye samtang nagakaon.

Pag bugtaw mo sa agahon

Haron eon si Nanay may handa eon nga pamahawon

Indi gid puyde nga indi ka magkaon

Ay si Nanay hay mahangit gid dayon.

Bago ka man maghalin si Nanay hay may una gid nga pabaeon

Agud Indi kami magutuman sa among mga ueobrahon

Ngani kami hay naila gid ag ‘wa it pagkagutom

Ikaw eang ro maeuoy kay Nanay it pageinaha para kamon

Kat kami hay may mga sarili eon nga pamilya

Ro among ginakahidlawan ro ay Nanay nga eaha

Ginausoy-usoy gid tungod manami ag malasa

Ganado gid sa pagkaon kon si Nanay nagatimpla

Gusto ko man tuearon ay Nanay nga kahugod

Pero Indi ko matupungan ag eain gid sa iban

Sa mga ueobrahon sa baeay ginasalig eang gid kay Nanay

Malisod gid gali kon owa si Nanay sa baeay

Ngani haron ro akong handum makaron

Ro sundon ay Nanay nga paagi sa pagpabahoe kamon

Ituro man sa among mga unga ro ginturo kamon

Agud indi man sanda malisdan kon mag eagko eon

Owa gid nakueang si Nanay it hambae kamon

Iba gid kon may sarili ka eon nga pamilya nga atupagon

Mayad eang si Nanay hay una permi kamon

Sa pag giya ag pagbulig kamon

Mabahoe gid ro among kabaeaslan

Kay Nanay nga owa it kagauyan

Indi mo mabatian nga imaw hay nagaoy man

Pero si Nanay hay naila gid lang gabulig kamon tanan

Ngani kay Nanay abu gid nga saeamat

Imaw man kay Tatay nga owa it pag balibad

Sa mga ueobrahon nga indi eon dapat

Saeamat Nanay ag Tatay, palangga namon kamo it mayad

Saeamat sa mga pribilihiyo nga inyo gintao

Sa pagpaeskuyla ag pagserbisyo

Indi kami masumo it pagpasaeamat

Tungod kinyo nangin mabakod kami nga tawo

Utang namon kinyo, ‘Nay ag ‘Tay

Ro kabuhi nga manami

Pasugti kami it baylo kinyo

Paagi sa pagpalangga ag pagserbisyo kinyo…

ni Jasmin Calizo-Vargas

Si Jasmin Calizo-Vargas hay nagaistar sa Tangalan, Aklan ag isaea ka Pre-school Teacher sa Three Angels Adventist Learning Center sa Kalibo, Aklan

“Geym Taym” ni Love Torres

“Geym Taym”

(Matsa manami hingan nga i-istorya

Mga tinion nga ako hay unga pa,

Indi man kunta ninyo ikangawa,

Kon ipaagi ko sa simpleng binaeaybay ngara.)

Ro mga unga gid-a kato,

Sa hampang numero uno.

Indi gid magpalugi, indi gid magpauto

Ro linya sa “Step-No” bukon dapat it tiko.

Hampangan ngane bisan ro libro

Paabu-abo kuno it tawo

Pili kung sa waea o sa tuo.

Ro pirde, pitikon sa ueo. ( Hay, tao! )

Mapabakae gid kay Nanay it guma,

Makaeakot eang it “tambaw-tambaw” ag  “itsa-itsa”

Kung madaog ngane hay dayon eon pahisa,

Kung mapirde, sigurado gid nga mangiya!

May mangayat ngane it “Tumba-lata”

Abaw! Maeakot man ag hala bira!

Perti ta! Matsa tag-iya gid it karsada

Saeakyan pa ro nagapabinit. ( Mga kabos ra! )

Masukoe gid it einagsan,

Tudo-tudo gid it dinaeagan

Madusmo ngane ag magasgasan

Tudo man dayon it nguyngoy, haning kabaean!

Idto man sa day Angkol Freddie

May gabasketbol nga mga eaki, “Onse-Onse”

Ro pirde, ‘wa gid it pagkalugi

Suhot malang man ro bayad, kung pila ro abanse.

Kat ro “Pitiw” man hay nauso,

Abaw maeakot man si Badoy Tamawo

Mayad eang kung masaeap it husto,

Agud di mabasoe it kaibahan sa grupo.

May “jolens” man kami kato,

“Taksi”, “Hantog” ag “Amo-amo”.

May “Haboy-nilas” pa ag “ Sipa-kabayo”

“Taym Pers” eang dayon kung medyo nahapo.

Unga gid man a, pirmeng bida-bida

Pag may hampang ngane, sige, maintra

Madaog, mapirde man o kung manina,

Owa gid-a gihapon it “pagkamadla”.

Basta hampang eang gid man

Owa gid ah ron it ayawan

Eaktan gid-a  ron tanan-tanan

Basta owa eang gid it gat-gatan.

Mapa-“P.S.-P.S.” man ron o “Ay Lab Yu”,

O kon “Langit, Lupa, Impyerno”

Basta sa pagbuhi it klase it alas-kwatro

“Geym Taym” eon gid-a ron, sigurado!

Mas mayad pa gid kon Sabado ag Dominggo

“Pinaka” eon gid ron it Abril ag Mayo

Mahampang iya, mahampang idto

Ro kulay eon dayon hay matsa negra ag negro.

ni Love Torres

Si Love Torres hay nagtapos it kursong Bachelor of Secondary Education -  Major in English  sa ASU – CHARRM, Aklan State University, Ibajay Campus. Nagabuoe imaw makaron it Master of Arts in Education – Major in Educational Management sa NVC ( Northwestern Visayan College ) Kalibo, Aklan.