MAEAS-AY NGA MATAM-IS ( 6 ) Mga Haiku ni Kasimaryo

MAEAS-AY NGA MATAM-IS ( 6 )

Mga Haiku ni Kasimaryo

________________________________

KANAS-KANAS

1.

Atop nga pawod

Ag haligi it baeay

Nagkaeabali.

2.

Baeas sa bibi

Pagwaeas it dayuyon

Nagkaeawas-ag.

3.

Baeay sa tupas

Bisan man sementado

Nagkaeatimpa.

4.

Budget sa bagyo

Gin-inusoy it tawo

Nagkaeaduea.

5.

Eanggam sa buho

Nagkinupag it usoy

Sa gubang pugad

6.

Eapok sa bukid

Owa it makapyutan

Nagkaeatup-ay

7.

Ginhimueatan

Ginpaugdok nga baeay

Nagkaeaapok

8.

Kwarta it pobre

Sa partial ag totally

Ginahinueat.

9.

Mga pinukan

Kahoy sa kagueangan

Nagkaeaanod.

10.

Nadueang isiw

Nagamueakang mus-an

Nagakinupag.

11.

Nagapanghuy-ab

Kuring sa daeapogan

Owa’t makawhat.

12.

Nagtinikaroe

Ro kaldero ag anglit

Sinaka’t ayam.

13.

Sige hinakwat

Igdaeapat sa baeay

Nagkaeapusa.

14.

Tupas saa suba

Ginbinayo it sueog

Ngkaeatup-ay.

15.

Yero nga bubong

Nahukwa ag inapok

Ginatinangda.

.

“Trowbak Man Kuno” (Throwback 1990’s) ni Love Torres

“Trowbak Man Kuno”  (Throwback 1990’s)

Sa agahon ayawan sanda kakon it pukaw, ( hay bueaw! )

Mapili pa dayon it gustong kan-on sa pamahaw

Masunggod eon dayon ag basta lang mapanaw

Nga gapinaduros it mata nga matsa bukaW.

Mabaktas eon dayon it dali-dali

Gakupag-kupag nga matsa natag-ihi

Paspasan gId it tikang ro siki

Makahingabot eang it “Flag Ceremony”

Pag-abot sa eskuylahan, gapamati ag gatuon-tuon man

Pag-recess eon dayon hay maeakot man sa einagsan

Basta hampang eang gid man ro istoryahan

Ay abaw! Indi gid ako magpaulihi sa listahan.

Pag-uli eon it hapon, abo pa nga hapit-hapit

Maadto sa baeay ni klasmeyt nga gapanampit

Makaon it tinapay o kon biskwit

Kon swertehon pa hay pinais o pansit.

Mahilig pa man magkuhit-kuhit

May eumboy, tambis ag  aeamahit

Bisan pa may mga siit-siit

Tiison basta eang man makasamit

Pag-abot sa baeay, mailis eon it pambaeay

Masag-ob it sangkiri ag sa karsada hay matambay

Angan-angan haron eon man dayon si Tatay

Halin sa eanas ag may bitbit-bitbit nga gulay

Subeangon gid si Tatay nga nagadaea-deagan

Mabisa kana ag dayon hay kupkop-kupkopan

Mabisa eon man dayon sa mga ginikanan

Eakton eon ro mga angkol ag kaantehan.

Kat oras eon it pag-ihapon

Sa kusina kami tanan gatipon

Dungan-dungan tanan nga makaon

Ag mag-inistorya sa natabo kaina o kahapon.

Angan-angan, manampit eon ro mga Tiya

May pagguwa kuno idto day Lola Sima

Matan-aw kuno kami it pelikula

Kat bala it betamax nga andang ginrenta.

Mabilin si Nanay nga indi gid magpakagabii

Asta eang kuno kami it alas-nuybe

Temprano pa gid kuno dapat mag-uli

Dahil pagkaaga hay may klase.

Hay, kami ta hay masyadong nawili,

Ro oras owa eon gid napan-uhi.

Mayad eang owa gid kami pagtrangkahi,

Ro pirtahan hay ginhigot eang it alambre.

Mapakarera eon dayon sa kwarto

Maplastar it banig ag muskitero

Maaeagawan it mahaea para sa ueo

May tandayan pa gid kon indi makuntento.

Makara gid-a kami kato,

Kat “Ambel jeans” pa ro uso

Kat ro “Pritos Ring” hay ginasuksok sa tudlo

Ag sa “Slambook” eang makita ro mga gusto.

Matsa kan-o eang gid-a no?

Ag hara eapit la’t ang magbaynte-kuatro

Hay, kahieidlaw gid-a ro kato

Kat gaistar pa kami sa Brgy. Agbago.

ni Love Torres

SA AKON NGA NANAY ni Sharlyn J. Mandin

SA AKON NGA NANAY

_________________________

Ikaw ro kabangdanan kon ham-an iya ako

Halin sa imong tiyan nabugtawan ko ro kalibutan bangud kimo

Ro Ginuo ro nag-agubay kimo nga mangin instrumento

Para eang ako mabuhi bilang isaea ka tawo.

Kimo eang ako nagsalig samtang nabuhi ako

Bangud ro matuod hay owa ako kon buko’t bangud kimo

Kon indi kita makita hay bukon it kumpleto

Bangud para kakon ikaw hay “d’ best” nga ina ko.

Saeamat bangud ako hay ginpa-eskuyla mo

Nagkantiguhan magsueat ag magbasa sa bulig mo

Saeamat nga una ka pirme sa akong euyo

Sa kalipayan o sa kalisdanang naangkon ko.

Apang sayod ko sa imong hiyum-hiyom hay may ginatago

Una sa likod ro problema nga may kasubo

Pero kamong magmaeanghod owa ginapakitaa nimo

Agud indi madaeahig nga kamon hay makaapekto.

Makaron ka kamayad ag kabuot nga ina namon

Sa among magmaeanghod hay mapinalanggaon

Sa among mahugod nga ama hay matinatapon

Ngane ro atong panimaeay haeos hay malipayon.

Ro mga problema hay nagaabot gid katon

Indi ka mahawag bangud ro Diyos may kabubut-on

Nga atong ginasaligan nga magpatigayon

Sa pag-agubay sa atong mga hilikuton.

Sa Ginuo hay himpit natong pangamuyuon

Nga kabay pang mangin maayad-ayad ro mga eawas naton

Ag ikaw maskin hasta san-o hay makaibahan pa namon

Agud ro atong mga handum ag pageaom hay atong maangkon.

ni Sharlyn J. Mandin

SA AKONG PAGHILAYHILAY ni Gezelle D. Solidum

SA AKONG PAGHILAYHILAY

Samtang ako nagapahuway sa idaeom it kabiyawasan
May eumagapok nga owa ko masayran
Gulpi akong nagbangon para tan-awon
Ay sus! Si Tatay taeabangon.

Nag dali-dali ako it adto sa anang ginpwestuhan
Hala ! Si Tatay nahueog sa hagdanan
Binuligan ko it patindog agud makapahuway
Aguy! Aguy! Kaeuoy man si Tatay.

Pinapungko ko imaw it dahan-dahan
Pinainom ko it tubi nga maligamgam
“Basi Tay ham-an nahueog ka?”
“Nagpilo malang ang tuhod,” sabat na.

Naghibayag lang ako it pilit
Pero sang baeatyagon masakit
Nakibot gid abi ako sang nakita
Napan-uhan ko imaw nga gakaya-kaya.

Sa uman Tay magdahan ka eon ha?
Sa hagdanan ngarong gina balda ka
Pati ako napaeukso it aeang-aeang
Mayad eang gid owa ako nagtaeang.

ni Gezelle D. Solidum  

Laguinbanwa, Ibajay, Aklan

REYALIDAD - Jasmin Calizo -Vargas

REYALIDAD

kat ako hai bata pa

permi ko nabati-an kay Lola

ro saembiton nga "malisod gamintinar"

indi ko maabot maisip kon ano ro buot singhanon kara...

samtang nagadaeagan ro panahon

indi gid nakon maabot ro buot singhanon it hatong panaeambiton

ngani gusto ko mareyalisar samtang bata pa ag may panahon...

reyalidad hay akon eon naangkon

kat si Lola hay naduea eon kamon

naisip ko nga hara gali ro buot singhanon

"malisod gamintinar" it kabuhi naton...

reyalidad nga medyo indi ko mabaton

pakon sa simpleng bagay kon imo isipon

malisod gid man gamintinar it tanan pakon sa imo nga kaugalingon...

reyalidad nga hasta makaron hay ginapalibugan nakon

kon paano ko mintinahon ro bagay nga nagapalibot kakon?

ngani mga kasimanwa ko nga akeanon

ikalipay lang naton ro kabuhi nga ginpahueam katon...

- Jasmin Calizo -Vargas

Dear Paghigugma (Ro Pangpangaywa) (The Second Letter) - Love Torres

Dear Paghigugma (Ro Pangpangaywa)

(The Second Letter)

Dear paghigugma, kamusta ka eon baea?

Hara eang gid ang nasayran nga unang ipangutana.

Nabaton mo gid man ang sueat nga ginpadaea?

O basi nagtaeang eomat ana ‘to o owa mo man lang nakita?

Kon nabaton mo gid man, kunta nagpasayod ka

Indi nga may mageusot eang kakon it basta-basta

Kon nabasa mo man ro akong mga kataga

Indi mo gid kunta basta eang ibalewala

Paghigugma, pakieksplikar ngane kakon it masadya

Bukon it matsa palapong ag nagapakueba

Ano ro mga sinyales, ano ro mga tanda

Eain gid man baea ikaw ag si Pagpalangga?

Paghigugma, kon ikaw eon abiron, magpormal ka man

Indi nga matsa gahampang it patugma-tugmahan

Malisod eon, basi ako hay magsaea o mataman

Bukon pa man ra it basta eang nga daeahaean

Paghigugma, nagapaabot eang gid ako

Magpakilaea ka eang gid kunta it husto

Malisod man abi nga pirme magpainu-ino

Kapin pa gid kon owa ka man nagapasigurado

Paghigugma, eubta eang gid ako

Indi ka eang kunta mahangit o magreklamo

Akon malang man gusto kimong iklaro

Wa gid-a ako naila nga maloko

Paghigugma, pangabay ko eang gid-a

Buligi ako, buksi ang panghuna-huna ag mga mata

Kon ikaw eon gid man ro gapabatyag ngara,

Magpasiguro ka kakon nga ikaw gid si “Paghigugma”

Paghigugma, pasensya ka eang kon medyo istrikta

Makaron gid man siguro basta maestra

Pero kon kaeubot, gataha ag matuod nga ikaw ra

Malipayon ako nga ikaw hay makilaea ag makita.

Hay paghigugma, ikaw lang ro bahala

Gasalig gid ako nga indi ka magpabaya

Nugay pagpabay-I nga ako hay madaya

Salbara ang mata ag tagipusuon sa euha.

Paghigugma, kunta ulihi ko eon nga sueat ra

Kon puydi nugay eon gid pagpatatloha

Basi maubos eon ang bukabularyo ag pasensya

Ag malipatan ko nga makapangaean kita daywa.

Hay paalin, Paghigugma, sige eon-a

Magdahan ka lang kon siin ka man kara

Pabatyag ag senyas eang kakon kon ikaw eon gid ra

Agud subeangon ta sa krosing it Brgy. Gugma.

- Love Torres

Former faculty member

Melchor Memorial School Inc.

Laguinbanwa, Ibajay, Aklan

PAGTAHOD SA PAGHIGUGMA - Sharlyn Joy J. Mandin

PAGTAHOD SA PAGHIGUGMA

Paearehas ro tanan sa paghigugmaanan

Manggaranon o pobre ro mga nadangatan

Owa ginabasehan andang pangabuhian

Ro eabaw eang sa tanan hay ro pag-ueonongan.

Pero ham-at makara ro pangabuhi’t tawo?

Ginahimo rong tanan naming pagsinaeayo

Apang ro hambaeunon ” tawo owa’t kuntento”

Sa atong kalibutan haeos tanan gaba-o.

Masubo gid  matuod nga eaom mo mahae ka

Haeos ro kabubut-on pagsalig sa hin-aga

Ginhimo gid ro tanan nga magpalipay kana

Agud sa imong euyo imaw indi maduea.

Pero ro paghigugma bukon it kabangdanan

Agud inyong relasyon owa it katapusan

Sa tanang mag-asawa ag sa magnobyohanan

Pagsalig sa isaea ro haeos kinahangean.

Bangud gid ro pagsalig pagtahod hay naangkon

Ag ro pagtaeahuran eabi gid nga nagpag-on

Ngani ro ginahandum nga mangin malipayon

Hipigan ag tahuron ro tawong higugmaon.

- Sharlyn Joy J. Mandin

Former Associate Editor

The Panicle – The Literary folio of

Aklan State University

ASU Ibajay Campus

PARA KAY CELIA - GREG M. IBESATE

PARA KAY CELIA

Kon sa kamera eang kunta

Ro imo nga matuod nga kabuhi

Hay pwede ko nga islan

It mga bueak

Ro eotay

Sa imong likod

Nga natipon it imong nagtaliwan.

Pero

May mga mata man gihapon

Nga maga dilot

Sa imong litrato

Nga bisan nakasaya ka

Ag mahaba ring manggas

Tan aw nanda

Ikaw hay ubabaehang

(Gin Inakeanon it nag sueat  PARA KAY CELIA)

- GREG M. IBESATE

Homelife, February 1995 Issue p. 39

SUNDAY INQUIRER MAGAZINE