PAGHIMUEAT ni Shur C. Mangilaya

COM. ARTS FESTIVAL

Maloco National High School

November 23, 2013

Mary Shiey M. Mangilaya

Ibajay Nationa High School (INHS)

( Performer)

PAGHIMUEAT

ni Shur C. Mangilaya

KON amat hay ginapainu-ino nakon ro akon nga pag-eskuyla sa highschool. Matsa adlaw-adlaw lang hingan nagaprinoblema ro akong mga ginikanan sa akong pamasahe ag baeon sa ilabas. Naeuoy man eani kunta ako kanda,ugaling alinon naton bangud ro akong nabugtawan nga pangabuhi hay pobre. Sa eanas manlang nagatrinabaho si Tatay bilang isaea ka mangunguma ag si Nanay hay isaea ka mamumugon sa eanas, manuggaeab kon tag-aeani, manug-eunob ag manugganit it paeay. Maskin eani ako hay nagabulig it gaeab sa eanas kapin kon owa it klase. Ap-at kaming magmaeanghod, ro tatlo pa nakon nga mga igmanghod hay mga maisot pa, eani sanda lang permi ro nabilin sa baeay. Kon amat hay ako ro nagaabilin kanda ag nagaeaha it amon nga ilabas.

Haeos maabu ro kakueangan nahanungod sa akong pag-eskuyla. Halin sa ginasuksok nga eambong ag mga gamit. Naibot man kunta ako sa ma manggaranon ko nga mga classmate, bangud may anda nga mga maeahaeong mga gamit kamana it touchscreen nga cellphone, ipod, tablet, ag laptop. Ag haeos nagapaeanobra ro andang mga kwarta, permi eang sanda makit-an sa internet café nga naga facebook. Perming fried chicken ag maeahaeong mga suea ro ginabaeon sa ilabas.

Kon gabii, bago magkatueog hay ginapanumdom ko ro akong nadangatan sa akong pag-eskuyla. Kon amat nga may mga paguwa nga mga activities sa eskuylahan hay indi ako makaeakot bangud owa it pangbakae it mga kinahangeanon nga gamit. Ngani indi haeos ako makaeagas it mataas nga grade. Nagasueod sa akong painu-ino kon amat nga indi lang magpadayon it pag-eskuyla. Agud indi eon magpinangadhap ro akong mga ginikanan it kwarta, kapin sa mga baeakeunon sa akong mga projects. Mayad lang siguro nga magmunot lang ako sa Manila ag magpanggaeon sa mga manggaranon sa mga daeagko nga subdivision. Basi mailaan pa nanda ro akong kahugod ag anda akong pa-eskuylahon sa college. Pero ham-at sa panggaeon it sueuguon, kon puydi malang makasueod sa mga daeagko nga restawran bisan tagahugas eang it pinggan. Basi makaantiguhan pa dayon ako mageaha it manamit nga mga putahe. Ag kon swertihon pa hay makapatindog it kaugalingon nga restawran.

Puydi man nga sa Boracay lang ako mag-apply it trabaho. Maskin tagahimos it eugban it ma foreigner sa daeagko nga mga hotel ag resort. Basi kon swertihon pa hay makaasawa pa it gwapo ag manggaranon nga kano. Ana pa dayon sabon ako nga daehon sa America. Puydi man nga magpatindog kami it resort o magnegosyo sa Boracay. Mapaobra ko eon dayon ro among guba nga baeay. Mahinyo pa dayon ako nga magbakae it saeakyan nga van agud permi kami nga makapamasyar kon siin- siin nga mga lugar sa Pilipinas.

Kon owa eon gid man it swerte hay ma-audition lang ako sa Wowowillie ni Willie Revillame. Basi maka-jackpot pa it 1 million. Puydi man nga magtan-aw sa showtime ag mageakot sa cinemoto. Basi mailaan pa it director ro akon nga pang best actress nga acting ag ana pa ako nga obrahong regular host it sikat nga noontime show, kaibahan sanday Vice Ganda, Anne Curtis, Karyll, Vhong Navarro ag iba pa. Sigurado nga gulpi pa akong sikat ag tueompukan pa dayon it mga fans kon mag-agto sa mga mall. Papirmahon pa dayon ako it ABS CBN bilang andang sikat nga artista ag mangin mainstay it teleseryeng Annaliza. Puydi man nga Iading-lady ni Coco Martin sa Juan de la Cruz, o ni Daniel Padilla sa Got to Believe in Magic. Yesss!! Sikat eon dayon ako ag abu eon nga kwarta. Puydi pa ako nga magpagwapa it husto kay Dra. Vicky Belo. Basi makibot pa ro akong mga kasimanwa kon ako eon ro mangin guest sa amateur nga Ibajay Idol kada magpaeaabuton ro Ati-Ati Festival. Kon indi man galing swertihon sa ABS CBN hay sa GMA network lang ako ma-auditon sa ikaw at Echo, ka-voice ni idol. Total, manami man ang limog kuno. Basi sa pagkanta ako makilaea ag sumikat bilang isaea ka singer. Kaya ko man ro mga ginakanta it sikat nga mga singer kaparehas kanday Sarah Geronimo, Yeng Constantino ag Charice Pempengco. Maskin mga international singers hay kaya ko man paris kanday, Rihanna, Avril Lovato, Beyonce, ag Taylor Swift. Kon indi pa galing makapasa hay maeakot lang ako sa contest it fliptop. Basi maka-duet ko pa sanday Abra, Loonie, ag Basilyo. Lord…patawad…pagkat ako’y makasalanan… makasalanang nilalang.. Tama! Youtube sensation pa.

Sayod ko nga matsa imposible nga posible hingan ro akong mga ginahandum. Akon malang agud maskin paalin hay nangin malipayon ako sa akong mga handum. Pero sa kamatuoran, hara ron nagabatyag it kalisod sa adlaw-adlaw nga hilikuton sa pagpangabuhi. Pero indi a, basta padayon gihapon ako nga magahandum it akong manami nga future. Basta mag-eskuya eang ako it husto sa highschool. Maghugod, magtinguha ag maghimueat. Mangin mabuot ag mabinuligon eang sa isigkatawo. Hueaton ko lang ro akon nga swerte nga maangkon. Masueod lang galling ako bilang isaea ka working student sa college. O magtuon eang it mayad agud basi makapasa pa ako sa scholarship program it gobyerno. Agud kon makatapos ako sa pag-eskuyla ag makaangkon it maayad-ayad nga tabaho hay makapatigayon eon ako it pagbulig sa akong mga ginikanan. Agud makahaw-as eon kami sa among kapobrehon.

Hayyy!! Malisod magpinanamgo it mga bituon. Pero kwidaw, wika nga… hindi masamang mangarap. Malay naton nga magminatuod ro akong mga damgo. Mas malisod ro owa it handum sa kabuhi, bangud tanan malang kita hay natawo sa damgo. Ngani kon amat hay ginapasugtan ko lang ro akong huna-huna nga mageupad-eupad ag apukon it hangin sa lugar nga kon siin ako mangin malipayon. Sa lugar nga owa it pobre ag manggaranon. Sayod ko nga matsa imposible ro akong mga damgo, Apang owa gid kuno it imposible sa atong mapinalanggaon ag maeueuy-on nga Ginuo. Kapin ro atong pagdangop ag pagpangamuyo Kana hay hantop ag himpit sa atong tagipusuon. Para eamang mapatigayon ag maangkon ro atong mga handum sa kabuhi. Ngani ro akon nga paghutuhot ag pagtinguha nga makatapos it pag-eskuyla ag makabulig sa akong mga ginikanan ag igmanghod sa ulihing adlaw hay akon gid tinguhaon. Bisan magantos it kalisod. Padayon ako nga magasukoe sa kalisdanan, agud ro paeaabuton nakon nga hin-aga hay mangin mabinungahon ag mabinueawanon sa padayon nga pag-uean it nagasiga nga mga bituon.