EAPOS - EAPOS
__________________________________________
EANDONG
ni Shur C. Mangilaya
Malinong ro tungang gabii
kat nagsubeang kita sa akong
panamgo.
Nakabiste ka it puti nga eambong.
ag makasieilaw ro imong uyahon.
Akon ikaw nga ginatinueok ag
kilaeahon,
apang hinali ka nga nadueman
ag nadueaan sa akong panan-awan.
Napan-uhan ko nga nagatindog ka
sa akong atubangan.
Naghiyum-hiyom ako kimo
ag gindawat ro akong alima.
Apang padayon ka nga nagahipos
ag haeos owa nagahueag.
Nakasuksok ka eon it itom nga
eambong
ag nagahibi samtang nagatinueo
ro mapus-aw nga mga euha
sa imong maeangsi ag eusot nga
uyahon.
Hinali ako nga hinuyop it hangin
ag inapok paeayo nga paeayo.
Tumambuok sa kaeangitan
hasta nga nahueog ag tumabusok
sa matsa owa it katapusang daeom
nga bubon it kaduduoeman!
__________________________________________
EUNO
ni Shur C. Mangilaya
Nagapinaniid ro suksok sa may
kisame,
sa nagaeinupad nga mga daga-daga
sa palibot it mahayag nga bombilya.
Amat-amat ag mahinay
ro pagkamang kat napan-uhan
ro isaea ka daga-daga
nga nagahapon sa dingding.
Madasig nga tinukmo
ro nagtaeang nga daga-daga.
Samtang sa saeog hay nagahinueat
ro mga tagasaw sa pagguyod
ag paghakwat it mga nagakadagas
nga mga pakpak it mga daga-daga.
Sa guwa hay magae-umon ro tyempo.
Nagatingha eon ro kahayag
sa pageapnaag it kadueom.
Ag nagapatimaan ro pagtueo
it mabaskog nga bunok it uean.
__________________________________________
SAEOT
ni Shur C. Mangilaya
Ugsad ro buean
kisyang gabii nga maeangaang.
Maeuya ro piit it mga gangis
ag mahinay ro tamsok it mga suksok.
Nagatinangda sa buean ro itom
nga kuring sa may bintana.
Samtang ro banghoe it ayam
hay matsa halin sa idaeom it eugta.
Hinali nga naghuyong ro payag
nga matsa may sangka bagay
nga tumugpa sa atop nga pawod.
Nagtangda ro magueang
nga baye sa sueod it payag.
Mahipos nga nagpinamatyag
samtang nagakinaes ro pawod.
Humuyop ro mabaskog nga hangin
ag nagsalida ro kaeamig sa sueod.
Mabaskog nga nag-uwang ro eapsag
nga ginakuekoe it nanay
ag pilit ginadutdot sa anang eawas
ag dayon nga ginputos it haboe.
Maskin nagapaeangurog ro nanay
“Pag-agto t-a kamo sa inyong
paeanawon
ag buko’t ana kami ro inyong
saeuton
sa among malinong nga katueogon.”
Hinali nga eumagapak
ro matsa maeapad nga pakpak
nga nagapaeayo, nagapaeayo…
____________________________________
SUBEANG
ni Shur C. Mangilaya
Nagduhong ka sa may tampaan
pagkabati nimo ro tamsok it suksok.
Owa ka nagpadayon sa pagtikang
sa imo kunta nga paeanawon
bangud sa natungdan nga paghuni
it suksok sa ibabaw it ugsaran.
Nadumduman nimo nga kisya
hay ginsaway ka it imong lola
pagkapan-o nana nga may naghuni
nga suksok samtang ikaw
hay nagapaguwa sa inyo nga baeay.
Ginhambae ni Lola nimo
nga paeampason mo anay
ro pilang segundo bago ka magpanaw.
Tungod basi magsubeang kamo
it imong kakapid sa disgrasya.
Bangud ro sangkurong panyempo
hay signos nga makapugong sa imo
nga pagsumaeang it kaeainan sa
daean.
__________________________________________
TAEANG
ni Shur C. Mangilaya
Nagharu sa uyahon
it akong eapsag ro nagtaeang
nga itom nga alibangbang,
samtang nagaeubog kami
sa sueod it among baeay.
Ag dayon hay naghalin-halin
it paghapon kon siin-siin,
nga matsa may ginausoy.
Hasta nga naghapon sa euo
nga sampagita nga nakasab-it
sa leog it daan nga Santo Niño.
Gintabog ko ro alibangbang
sa bukas nga bintana,
hasta nga nagguwa.
Ag samtang ginasarhan ko ro bintana
hay matsa may taean-awon
nga nagtuhaw sa kadudoeman.
Kabay gid nga bukon it maeain
nga anunsyo ro hatod nimo, amigo!