ni Malayag
Kada kandidato hay may preparasyon
Sarang maibulig hay pagahimuon
Tanang rehistrado hay
pang-engganyuhon
Agud pagkatawo hay pagadumdumon.
Kon magpanaw-panaw hay
gahiyum-hiyom
Promisang serbisyo kuno panamion
Pobre nga barangay hay paasensuhon.
Agud progresibo ro paeaabuton.
Sa kaeaeakinhan hay makiangayon
Sa kababayenhan, maabi-abihon
Sa mga inunga hay mapalanggaon
Sa mga magueang hay matinahuron.
Kon ro kandidato mga manggaranon
Mga pumueuyo hay bola-bolahon
Asta nga mahueog andang kabubut-on
Kon indi madaea huyapon nga bakeon.
Kon ro kandidato buko't manggaranon
Ro anang ugali hay
mabinuligon
Kon may mga dagyaw imaw eang hay
tawgon
Agud makabulig nga maghimatuon.
May nagapapunsyon nga ginapahaom
Tanang kasimaryo hay pagakangayon
Para
pakaunon ag dayon paimnon
Agud madumduman, pag-abot eleksyon.
Mga kaeanasan sarang nga baktason
Mga kabukiran sarang nga tukaron
Mga kasubaan sarang nga tabukon
Mga kaeaeawran sarang nga eanguyon.
Owa it kaeamig maskin nga ueanon
Owa it kainit bisan nga silakon
Owa it pag-untat pakon nga bagyuhon
Basta may pagsalig nga pagabutohon.
__________________________________________
PAMISAEA IT HAEANGDON NGA BISITA
ni Malayag
Masadya, masadya sa amon nga plasa
Bangud nga disperas it amon nga
banwa
May pagahiwatong padungog sa rayna
Nga koronahan it haeangdong bisita.
Manami, manami anang pamisaea
Gwapong pulitiko namon nga bisita
Ginkangay pa nanda sa maeayong banwa
Agud magpadungog sa gwapa nga
rayna.
Maabu, maabu ro mga promise
Ro mga istorya hay gapaeanobra
Anang ginadayaw tanan nga kilaea
Kapin ro opisyal nga nagbulig kana.
Nalipay, nalipay mga nag-aeagto
Nga magpinamati sa anang anunsyo
Maabot eon kuno ro anang proyekto
Nga makabulig gid it husto sa tawo.
Mabaskug, mabaskug mga paeakpakan
Nga makabueongoe nimo pamatian
Bangud puro eamang mga kapurilan
Ro anang proyekto nga indi
mapuslan.
Saeamat, saeamat sa anang pangadi
Tanan naengganyo nga magpinamati
Sa mga mensaheng ‘nimo pinasahi
Sayod eon man tanan nga itum ‘nang
ihi.
