________________________________
KINAIYA
1. BUGAEON
Matsa bugarit ka gid hingan kon
maghueag
Nagapakuno-kuno nga manggaranon
Tikalon kon pahambaeon ag pawakaeon
Owa it hakat sa mga tawong
nagapaeamati
Nagapangeapaw kon pasugiron
Nagasinugilanon nga abung nasayuran
Owa ka it hakat bisan owa it
kamatuoran
Ro imo tanan nga mga ginasinugid.
Basi baea ro imo ngaron nga
pagkabugaeon
Hay huypon ka it mabaskug nga
hangin ag apukon!
________________________________
2. HAKUG
Matsa imo lang hingan tanan ro
hueay
Haeos tanan hay imong ginaako
Matsa hap-an mo lang tanan ro
manggad
Owa eon nimo ginataw-i ro imong
paryente
Owa eon nimo ginasapaka ro imong
kaibahan
Owa ka it hakat bisan indi sanda
makasamit
Basta eani tanan nga kinahangean
It imong kaugalingon hay imong
bue-on
Haeos akuon mo lang tanan ro grasya
Bisan owa it hueay ro imong
isigkatawo.
Basi baea ro imo ngaron nga
pagkahakug
Hay tubuan ka it sungay ag mahabang
ikog!
________________________________
3. IMUT
Matsa owa ka hingan pirme it kwarta
Maskin kilaea ka eon nga
manggaranon
Owa ka gid hingan nagabakae
It maeahaeon nga biste ag mga gamit
Owa ka man nagapanao it bulig sa
isigkatawo
Owa ka man nagahaead it limos
Kapin sa mga tawong may kalisdanan
Nagamantiner ka gid lang it
baratuhon nga suea
Bisan maabu ro imong manggad
Hay nagabalibad ka gid lang nga owa
it kwarta.
Basi baea ro imo ngaron nga
pagkaimut
Hay magmasakit ka hasta ing manggad
hay magabot!
________________________________
4. PAL-IT
Matsa indi ka gid hingan mapangabay
Imo gid lang haeos tanan ro
matarong
May bangdanan nga masakit ro ueo
Ag maeuya ro eawas bangud
ginaeagnat
Kapin may nagahinyo it bulig kimo
Mayad ka magbalibad sa imong isigkatawo
Agud indi makabulig sa daeagyawan
Gusto mo gid lang nga makaginansya
Kapin sa hueueayan it grasya
Haeos nagapaeanobra ro imong hueay!
Basi baea ro imo ngaron nga
pagkapal-it
Hay angkiton ka it sawa nga may
halit nga dalit!
________________________________
5. PURILON
Matsa owa ka gid imo it hakat sing
ginasugid
Ginapasaut-saot mo eang ro imong
isigkatawo
Haeos owa it kamatuoran ro imong
sugilanon
Paeuksuhon mo eang hingan ro ing
kaistorya
Mga kamaeayran eang ro imong
ginaako
Mayad ka gid magtago it mga sikreto
Mayad ka gid magbalibad sing
kasae-anan
Indi ka gid mabue-an it matuod nga
sugid
Haeos puro pinadapoe ro imo nga mga
sabat
Ag Indi ka haeos mapuslan kon
pangutan-on.
Basi baea ro imo ngaron nga
pagkapurilon
Hay angkabon ka it buaya ag buhi
nga tunlon!
________________________________
6. SUPAE
Matsa owa ka gid hingan it
ginapatihan
Indi ka matur-an kon ano ro imong
himuon
Indi ka mahambaean o masugo it
ueobrahon
Owa kimo it mayad nga tawong
manughambae
Owa ka nagapati sa sugid it imong
isigkatawo
Haeos imo lang tanan ro matuod nga
sugid
Imo eang pirme ro tama kon
magbaeaisan
Indi magpadaug-daog sa sueupaean
Owa ka man nagasunod sa manaming
eaygay
Bisan kunta para sa imo man nga
kamaeayran.
Basi baea ro imo ngaron nga pagkasupae
Hay matuead ka sa ban-os ag owa it
duga nga sapae!
________________________________
7. UKUG
Matsa owa ka hingan it nabatian
Nagapinabungoe gid lang kon tawgon
Nagapinadungoe gid lang kon suguon
Owa ka it hakat sa ginapangabay
kimo
Maskin singgitan ka pa ag wakaean
Hay matsa nakabati ka nga owa
Owa gid sa imong bungog nga
magpamati
Ag magtuman sa sugo ag ginahinyo
kimo
Owa ka gid it hakat sa mga
nagakaeatabo
Kapin sa mga kalisdanan nga
bueoligan.
Basi baea ro imo
ngaron nga pagkaukug
Hay tuk-on ag usangon ro imong
daeunggan it banug!
________________________________
8. BUNGKOE
Matsa owa ka hingan it kabueosgan
Basta may pagkaon kang makit-an
Hay nagamueodlat ro ing mata
Ag nagakutam-kutam ro ing baba
Owa haeos it handaan o punsyon
Nga owa nimo ginaagtune
Ag haeos tanan ro putahe hay
samitan
Hasta nagahinta-hinta ing ginhawa
Bangud sa kaabu-abu nga einamon.
Basi baea ro imo ngaron nga
pagkabungkoe
Hay hueogan ing ueo it bukoe ag
magbueokoe!
________________________________
JULSH M. MASANGKAY
Sta. Cruz, Ibajay, Aklan