ALIPUEOS IT BAGYO
1.
Halit sa kadunaan
Baeos it kagueangan
Eunod ro kapatagan!
2.
Nagabunok nga uean
Haeos indi mapunggan
Baha ro baeantayan!
3.
Nagawaeas ro baeod
Sa gadumot nga eawod
Baruto hay kumueob!
4.
Nag-untat ro asenso
Sa pag-agi it bagyo
Pangabuhi binayo!
5.
Owa gid it maagyan
Sa eapukon nga daean
Ro tawo nagataeang!
6.
Owa’t maeamong suea
Sa maeubog nga baha
Ro tawo nagatingha!
7.
So amihan nagtawhay
Habagat nagpahuway
Sa baeos it kanaway!
8.
Ro baeay hay kumaya
Ro tulay hay humapa
Sa bagyo nga tumugpa!
9.
Ro baha nga masueog
Nagpaeuka sa niyog
Nagkinupag ro kabug!
10.
Ro gindaea it baha
Mga kahoy nga dagsa
Nagpabugtaw sa saea!
11.
Sa bagyo nga inagyan
Owa’t pangabuhian
Gaid sa kapobrehan!
12.
Sa hanging owa’t pae-at
Ag ueang sige hathat
Batyag gid ro kabug-at!
13.
Sa eupok it daeugdog
Nagkinupag ro hakug
Sa manggad nga nahuslog!
14.
Sa paghubas it baha
Abung eay-on ro eugta
Pangabuhi hay guba!
15.
Tubing gaalipueos
Hanging nagahagiyos
Pangita hay naeumos!