PAGKABUGTAW
sa ay tatay nga pagpukaw,
sa eamharon ko nga kadueoygon;
senyas it pagbugtaw,
sa tunga-tunga it kaaga-agahon.
minukeat ro mata sa kadueoygon,
hiniod- hiod eawas nga eamharon;
bugtaw dali-dali sa pagbangon,
sa eugban nagtalikwas dayon.
sa pagdinali nakon,
pagkatapos it bangon;
einugban ko owa malipson,
sa huna-huna ko anwang sa hieigtan akong pagagihiton.
nagasako adto sa kug-ungan,
sa anwang nga dungganon;
agud igihit sa gieihitan,
anwang pakan-on agud mabusog dayon.
sa pagsubat it adlaw,
sa sidlangan naga silaw;
takdan it arado,
bisan gutom pa ag gina uhaw.
sa pagpanaw it dinag-on,
sa eanas inyong tan-awon;
binuslan it bao-bao,
nga sa eanas naga arado.
sa paggamit it pamaagi nga bag-o,
sa uma, makinarya madali ro trabaho;
pagtanum, paggaeab, gi-ok ag pag-ani,
gamit hay bag-ong estilo.
pero, indi ko masayuran, ham-an kato,
paeay namon sako-sako, tumpi-tumpi sa tambobo;
kung ikumpara makarong tyempo,
kueang gihapon rong produkto.
ano baea rong kabangdanan,
gusto ko masayuran;
ah... hilo nga kemikal ag pestisidyo,
sa kaumahan naton naga abuso.
___________________
PAGPANIKOP SA KATUNGGAN
mali eon sa katunggan,
ayupit ag aeat bitbiton;
si tatay si nanay kaibahan naton,
manikop it bisan ano nga sieipton.
alimango nga 'ligyanan,
sugpo, hipon ag pasayan;
bisan kamangi nga puti-an,
atong padipuslan.
apang maghinay-hinay,
sa usok nga taeabahon;
basi rong dapa-dapa nga magamay,
magasgasan, maninahan nga dayon.
magpangulis it kayog,
sa kilid it mga tipuso;
bagungon nga bantog,
ipasupsup sa imong nguso;
bagtis, ubog, ag ilongan,
bae-a, danggit ag tilapyang tiyanan;
baeanak nga malisod madakpan,
hara tanan manamit sabawan.
sa tanan nga maninikop,
inyo nga haeungan ag indi paglipatan;
isda o bisan ano nga madakop,
kung hara hay bihuran, dapat buy-an.
__________________
TUBI
nagwas-ag ka it kabuhi;
sa malikot nga kalibutan;
kakahuyan, kasapatan pati mga kapispisan,
tanan-tanan nga owa't ginapili.
sa matawhay mong pagtupa,
tutunlan ag dahong maea ikaw ay sinaeap;
sanda tanan gapasaeamat,
sa owa’t katapusang pagtatap.
busay nga madaeum,
nagahueat sa malinong mong gahum;
sa madamoe nga gae-um,
tanang oras ikaw ginadumdum.
sa mahinay mong pagtubod,
subang malinong ikaw ay pinamudmod;
mga tanum sa eanas ag pukatud,
pag-abot mo hay kalipay nga tuod.
sa maeawig mong pamanawon,
nakasapoe ka sa baybayon;
sa silak it adlaw,
sa panganod umimpon para bumalik kamon.
- ELIEZER L. SEVILLA
Tagbaya, Ibajay, Aklan
