Simeon Sorrosa

aswang

aswang ka kuno
ginakahadlukan
ginapaeagiwan
ginalikawan
ginakaandaman
nagabag-o it hitsura
bungkoe it eab-as
nga dugo it eapsag?

a, imaw man gali
pirme ka sa idaeom it baeay
sa imong nabdos nga kaeapitbaeay.

hay basi, ham-at
naghilong
isaea ka adlaw
ro asawa it nabdos
nimo nga kaeapitbaeay?
 

_______________


Pagbalik

Isaea ka adlaw,
may nagduaw
sa amon nga baeay
kasugilanon si Nanay,

Ginkupkopan ako,
ginharuan
ag ginhakwat.

Nakibot ako.
Tatay ko gali.
 

_______________

bagyo

kinahang-ean pa baea
nga madangatan
ro paghanot it bagyo?
ieubong it mga eapok
halin sa natup-ay nga bukid
ag maeumos sa baha
tungod sa pag-eapaw it suba?

ay, nagaampo eon ro mahilab
nga mga tiyan sa adlaw-adlaw
nga bagyo nga nagahanot
it pag-antos ag kalisod
sa kabuhi.

________________

hambae nimo

hambae nimo,

ako eang ro imo ginahigugma.

hambae nimo,

ako eang ro imo ginapalangga.

ako eang,

owa eon it iba pa

ro imo nga ginahandom

nga kaibahan

hasta sa kamatayon.

hambae nimo,

indi mo ako

ibaylo sa iba

tungod owa it makaeapaw

sa imo nga paghigugma kakon

ag indi eon ron magbag-o.  

hamabe nimo ron,

imaw nga nagapati ako.

pero ham-at

nag-text ka kakon gabii,

honey ro gintawag mo kakon?

di baea, sweetheart

ro aton taeaw-gan?

_________________

manugpakalimos

adlaw-adlaw ka nga nagapungko

sa bangketa.

nagadungok, nagapakitluoy,

nagahumyag ro imo

mahigko nga paead,

samtang nagahueat it taginting

it mga sensilyo sa tuktukon

nga lata sa imo atubangan.

apang ginaagyan-agyan ka eang

it mga siki nga nagadali

ag nagaeinagsanan

sa oras.

ay, kon nasayran mo

eang. pareho kimo,

manugpakalimos man kami.

mabuhay eon kami nga nagapakalimos

sa gubierno tungod

nga nalipatan eon hingan

na taasan ro amon

nga sweldo.

a, mas mayad ka pa eani kamon,

kaugalingon mo eang ro ginagutom.

_________________

pagbinag-binag sa kagab-ihon

nakaabot kakon ro balita nga nagawelga

kamo sa nagadabadaba nga puti ag pino

nga baeas sa isla it boracay samtang

ginabantala sa inyo nga mga karatula ro inyo

mabuhay nga ginapangayo sa gubierno.

ugaling indi makasil-ot ro inyo nga mga limog

suno sa pagbunae it mga baeod sa baybayon.

ginaeupad, ginaeupad it paeayo

ag naghalo sa nagakaealhit nga mga basura.

makaron nakon naintiendihan kon ham-an indi ko

makit-an ro kahayag sa imo nga mga mata,

kon ham-an magae-umon ro imo nga uyahon.

kasubo ro magaehuman ko sa imo nga panueok.

hu-o kasubo sa pagbuoe sa inyo nga kaugalingon nga eugta.

naisip siguro ninyo nga mas mayad

pa nga bukon it mauswag ro isla,

madali kamo magtahi it mga handom

owa it problema, owa it kakueba

nga basi sa inyo pagbugtaw, paeayason kamo

it nagapanag-iya kuno it eugta nga inyo

ginapanimaeayan. ginausoy ninyo ro paraiso

nga inyo nga gintawuhan pero hasta makaron,

indi ninyo maagom ro kalinong.

a, mas mayad pa eani ro mga namatay,

may anda nga kaugalingon nga eugta.

sanda ro matuod nga nagaagom it kalinong.

_________________

Binukot

Pinili mo nga magpanaog sa syudad.
Einayasan mo ro ginharian nga ginhaead kimo it kadunaan.
Gintalikdan mo ro imo nga pagkaprinsesa.
Gaoy eon ro imong huna-huna ag gusto eon nimo nga mahilway.
Ginuba mo ro maimon nga kalinong.
Kalinong nga nangin kahulid nimo sa kada adlaw ag gabii.
Ginpili mo nga mataeupangdan ro kataason it eangit.
Dangawon ro kaeaparan it eugta. Ag taw-an
it hayga ro imong mga panikangon.

Hangaway ka nga eumutos sa syudad.
Idto sa mga anino nga nagatabuk-tabok sa karsada
it nagabaeansuli nga mga kadudoeman, samtang nagaaeawayan
ro mga mueto sa entablado ag ginakunyag ro tungang gabii.
Sa syudad nga indi magpamati sa mga nagapangayo it tabang
samtang nagawinakae ag nagawaeas ro mga tawo sa nagapueaw nga karsada...

Idto sa nagapanghuy-ab nga mga rebulto.

Nangin ginharian mo ro lugar
nga ginapueawan it mga budli nga tiyan.
Sa nagapangayat ag hagae nga sonata.
Nagapanampit ro makahieilong nga mga ieimnon.
Samtang nagatinamboe ro mga makabueungoe nga tukar.
Ag ginaeag-ok ro imo nga nagaeutaw-eutaw nga kaeag.
Nahidlaw nga nagaeinagatik ro maeamig-eamig nga mga baso.
Nagaeaway ro mga buesa sa kada saot it hubeas nga eawas.
Makahieilong ro mga nagaliraw nga kahayag it iwag
ag ikaw hay nahilong...

Hilong nga hilong.

Nahilong ka sa kabuganaan nga haead it ginharian nga kueang
sa manggad, manggad nga haead kimo it kadunaan.
Eumunip ka ag naeumos sa purilon nga syudad.
samtang ginapas-an mo sa panumdoman ro imo nga kahapon.

Ginhawanan mo ro daean agud balikdan ro eandong
it imong ginbugtawan nga ginharian. Agud samitan
euman ro kabuganaan nga haead kimo it kadunaan.

Apang batsihon eon ro daean
paagto sa gintalikdan

nimo nga ginharian...

_________________

pasaylo sa akon nga ayam

pasaylo sa akon nga ayam

kon indi man kita

mataw-an it mumo

o kon bakog

sa kada magkaon ako

nga nagatanga

ka sa akon nga euyo.

pasaylo kon indi man kita

mabinlan it akon

nga ginakaon.

tungod pareho kimo,

ayam man ako nga mabuhay

eon man nga nagatanga

sa mga ginpangako

it mga naka-barong

sa gubierno.

_________________

Bisan pa

Bisan pa ibantala mo sa bug-os

Nga kalibutan nga owa ako it pueos

Pareho it pag-eapnaag it mga basura

Tungod sa pag-agi it baha.

Bisan pa,

Indi ko ron pagbatyagon.

Bisan pa gub-on mo ro akon nga pagkatawo,

Pareho it pagguba

Sa mga panimaeay

It nag-agi nga bagyo.

Bisan pa,

Indi ko ron pagbatyagon.

Bisan pa patyon mo ako sa kahueoy-anan

Tungod sa indi ko pagtuman sa aton nga ginsumpaan,

Indi ko gihapon ron pagbatyagon.

Basta indi mo eang ako pagpatya sa imo nga panumdoman.

________________________

komikero

sa imong nagabarlak nga eambong

ag sa makulay nga mga pintura

nga natampoe sa imo nga uyahon,

makit-an sa mata it mga unga

ro anda nga kalipay.

sa kamayad mo sa pagpahibayag,

nagaeinumpat sanda

samtang nagahaeakhak.

sa madasig mo nga mga alima

sa paghimo it madyik,

kon paalin nga nahimo

nga kalapati ro bueak,

kon paalin naduea ro sensilyo

sa imo nga paead

ag nageutaw euman.

kon paalin ro kuneho

nga ginsueod mo sa kahon,

gulpi nga naduea,

tanan nga mga unga

imaw-imaw gid ro anda nga pagkangawa.

huo, nangawa sanda.

pareho sa akon nga pagkangawa

kon paalin gintago

it makulay nga mga pintura

ag nagabarlak nga eambong

ro mga kapiutan mo sa kabuhi.

ag sa imo nga pag-uli

sa inyong tagpi-tagpi nga baeay,

sa piling it imo nga mga unga

nga nagakutkot it dukot

sa kaldero,

madumdoman mo euman

ro imo mabuhay nga handom

nga kunta, ro kabuhi

isaea man ka madyik.

__________

kaapin naton ro pageuha

indi pangpunggi ang mageuha

kon masakitan ka man

tungod sa paghigugma.

indi pangpunggi ang mageuha

kon masikway ka man

sa imo nga mga handum.

indi pangpunggi ang mageuha

kon eumugad ka man

it kalisod sa kabuhi.

indi pangpunggi ang mageuha

kon mamatayan ka man

it imong mahae sa kabuhi.

indi gid.

tungod ro pageuha hay may una nga gahom.

bangod pagkatapos it atong pageuha,

makangangawa nga makabatyag dayon kita it kaugan

ag katawhayan sa aton nga baeatyagon.

imaw eani indi pangpunggi ang mageuha.

indi.

tungod kaapin naton ro pageuha.

- Simeon Sorrosa

Bagacay, Ibajay, Aklan