HINUGYAW ( TRIBU IT AKEAN-2 ) TanagAkeanon ni Ati-Ati

MANGAMUYO KITA…

1.

Aba, ginoong Maria

Sa tam-is nga istorya

Istan lang madisgrasya

Tinipon ko nga grasya.

2.

Abaw, Juan Bautista

Ginbunyag mo nga kwarta

Gintago eon kunanda

Sa madaeom nga buesa.

3.

Abaw, Poncio Pilato

Gakaumang ro tawo

Padapoe ro serbisyo

Sa daeaga’t gobyerno.

4.

Abaw, Senior San Josef

Ro tawo gakuliit

Sa sweldong sangkiriit

Pagkaon ‘di kaangkit.

5.

Amay namon sa eangit

Ham-at sanda nahangit

Ag sige ro sininggit

Nga bitayon ro pal-it.

6.

Amay namon siin eon?

Imo man nga balikon

Ro among ginaeamon

Nga gintakaw eang kamon.

7.

Ay abaw, Santo Tomas

Apuka ro dimalas

Naubos eon ang hueas

Di gihapon ka haw-as.

8.

Jesus, Maria ag Josef

Owa’t sueod ang kawit

Inubos it kuyapnit

Ag mga tawong buysit.

9.

Hudas, Barrabas, Estas

Tsinelas ko nabitas

Mapilit eon ang hueas

Sige gihapong kamas.

10.

Maghinuesoe ka, Dimas

Dumdoma man ro baeas

Inubos eon it haw-as

Sa quarry it grinabas.

11.

Mahimayaong, Maria

Ano baeang istorya

Kuno sa pulitika

Makahueay ka’t grasya.

12.

O, Birheng Magdalena

Butangi man it kwarta

Ro gabot nga kahita

It tawong gaagwanta.

13.

O, Birheng Milagrosa

Naubos eon ang kwarta

Sa pagkandidatura

Owa man pagbotoha.

14.

O, Jesus ko nga lamang

Ro mga nagakamang

Basi baea magtaeang

Sa idaeom it dueang.

15.

O. Jesus nga mahilway

Tawo gapanampuay

Sa naguba nga tulay

Binasoe pa ro panday.

16.

O, Maria, iloy sang Dios

Bukid nagkaeaus-os

Mga kahoy naubos

It eagari ag buldos.

17.

O. Herodes pagguwa

Ginagaeo sa kawa

Mga pork nga kiniwa

It mga tawong yawa.

18.

O, San Lorenzo Ruiz

Ro nanay nagatiis

Nagpanghugot it tangis

Sa kaldero’t kiniskis.

19.

O Santo Papang Pedro

Nangawa mga tawo

Ro manggad it gobyerno

Hinueay it senado.

20.

O, San Roque. San Ramon

Mga ban-os nga hamon

Sa binit karsadahon 

May ungang nagakaon.

21.

O, San Pedro Calungsod

Butangi man it sueod

Ro pinggang owa’t sueod

Buko’t itip nga angtod.

22.

O, Senior Santo Niño

Pagkao’t mga tawo

Hinakwat eon it tunto

Paagto sa kongreso.

23.

San Jose nga obrero

Bantayan kunta nimo

Ro mga pobreng tawo

Nga ginluko it toso.

24.

Santisima Trinidad

Ro bukid bumaliktad

Nagtueop-ay ro manggad

It manakaw nga tamad.