KALINGAWAN ( 2 ) Mga Luwa ni Tag-ilaya

1.

Daeagang handum nga kamangon

Sa gabii hay halikapon

Pagbugtaw ko pagkaagahon

Anang lola a ro naangkon.

2.

Nagsaka si Tomas nga bungkoe

Sa may tuyong-tuyong it hansoe

May bungang euto nga ginbuoe

Kinaon ro pii ag busoe.

3.

Nangawa gid ako sang supot

Sardinas ag noddles sinil-ot

Nagkaeahueog ay nagabot

Sa puro kinupag it hakot.

4.

Ro paskwa sa amon nga banwa

Ro mga tawo nagapila

Sadinapit namong bisita

Nga nagapanagtag it grasya.

5.

Ro among saeakyan umus-os

Sa kilid-bukidsa may ubos

Owa abi matapos buldos

Bangud ro budget hay naubos.

6.

Ro hambae kato it bisita

May gaabot kuno nga grasya

Hueat-hueaton eang hin-aga

Hasta kara ginahueat pa.

7.

Ro mga pispis nga kuyapnit

Hay may ugali gid nga pal-it

Gusto gid tanan hay mangkit

Maskin ro pakpak hay sumab-it.

8.

Ro panyempo hay uean-silak

Kasae kuno’t banug ag uwak

Maw gali gawakae ro wakwak

Atop namon anang ginahak.

9.

Sa among baryo it katungaw

Maabung gasalidang eangaw

Iti it manok gasinungaw

Pagkaon namon ginakutaw.

10.

Sa bag-ong arado nga eanas

May mangungumang nagabaktas

Ginabitbit na ro tsinelas

Bangud eapukon ag nabitas.

11.

Sa huyop ag eapdos it bagyo

Pangabuhi’t tawo binayo

Ginhueat nga relief sa baryo

Hinueay ag ginpangremedyo.

12.

Sa pagtabok namon sa suba

Naeusot gid kami sang unga

Gakapay-kapay nga gatingha

Bangud ro baeas matsa sungka.

KALINGAWAN ( 2 )

Mga Luwa ni Tag-ilaya

TUN-OG - GREG M. IBESATE

TUN-OG

Tueo it pinong hamog

Nga naghalin

Sa nagakaeayong eangit

Nahihimong sangka baso

Nga maeamig nga tubi

Nga ga utod

It kauhaw

Hin-aga.

- GREG M. IBESATE

The FORUM, Vol 11, No.8

Official Student Publication

Northwestrn Visayan Colleges

SY 1991-92

JOSHPER M. CONANAN

DAGYAW

 

Kato anay…

Nagabueoligan ro mga kaeaeakinhan

Nagaieieiba ro mga kusog sa mga abaga

Sa pagpas-an ag paghakwat it baeay

Nga pagahalinon sa pihak nga lugar

Malipayon ro mga kababayenhan

Sa pagdat-on it mga pagkaon

Eangit ro pangabuhi

Sa bag-ong ginhalinan nga ieistaran.

Makaron…

Nagatieibyog ro mga kaeaeakinhan

Nagasieinggitan ag nagakaeapyutan it butkon

Sa pag-abang ag pagpugong

Sa mga tawo nga manugguba it baeay

Nagatinangis ro mga kababayenhan

Nakakinupag ag nagapaeangurog

Impyerno ro pangabuhi

Sa bag-ong gintapukan nga ieistaran!

NI JOSHPER M. CONANAN

GREG M. IBESATE

PAGHINYO

(Para kay Edward)

Pukawa ako

Bag-o magbutlak ro adlaw.

Basi hi kita ako

it mga iwag

sa poste it inyong

mga kaeapit it baeay.

Nagbueaw ako kara.

nagpueaw abi kita

it pag inusoy it naduea

nga parte

it gigsaw puzzle

it  bungalow.

Tagua gali it mayad

ro layter

nga pirmi mong ginahampangan.

Indi eon ako mag papaso

o maka singhot it asu

nga imo pirming gina tinago.

Sarha gali ro pueta.

Indi pag buksi.

Indi gid pag tid-i

Rang pag eayo.

Gin-Akeanon halin sa “PAKISUYO”

Ni GREG M. IBESATE

Home Life, February 2000 Issue

ELEMENTARYA ni Mary Shiey M. Mangilaya

Akong ginakahidlawan

Manaming mga inagyan

Malipayong nagtaliwan

Indi ko gid malipatan.

Mga tyempo it kasadya

Sa akon nga pag-eskuyla

Samtang sa elementarya

Madumduman mo gid ana.

Mga dati nga kaklase

Haeos mga komedyante

Kasangagon gid sa klase

Ag sa kaeangas nga pirte.

Kada sanda madumduman

Akon ginakahidlawan

Kunta hatong nagtaliwan

Hay magabalik it uman.

Maskin ako nasubuan

Sa among pagbueueagan

Manaming pagsaeayuhan

Indi ko gid malipatan.

Ibajay National High School

Colong-Colong, Ibajay, Aklan

GREG M. IBESATE

PARA KAY CELIA

Kon sa kamera eang kunta

Ro imo nga matuod nga kabuhi

Hay pwede ko nga islan

It mga bueak

Ro eotay

Sa imong likod

Nga natipon it imong nagtaliwan.

Pero

May mga mata man gihapon

Nga maga dilot

Sa imong litrato

Nga bisan nakasaya ka

Ag mahaba ring manggas

Tan aw nanda

Ikaw hay ubabaehang

(Gin Inakeanon it nagsueat  PARA KAY CELIA)

GREG M. IBESATE

Homelife, February 1995 Issue p. 39

SUNDAY INQUIRER MAGAZINE

_______________________

BAEAY

Tungang gabii

Kat mabali ro haligi

It among baeay

Ay sumunod ra espiritu

Sa espiritu

It Ginebra.

Mayad ngani

Ay may kingki kami

Nga bisan gaimamaeong

Kita ko gihapon

Ro badlit kang paead

Ag imaw nakon

Nga gin sueay.

- GREG M. IBESATE

BUEABOD, Vol 5, May 1994

BUDYONG, February-March 1996

Vol. 1 No. 4

3^rd Place, Poetry Writing Contest, 4^th MIAG-AO SUMMER ARTS CAMP, UPV, Iloilo City, May 29, 1994

SHALLEN MAE M. FERNANDEZ

MOLAVE 

Seksyon nga perti sa wakaean

Pag gin panisgan mga kabaean

Sa kalokohan ‘di magpalugi

Pag-abot nga gintukso nganganga sa klase.

Sa seksyon ngara makita mo tanan

Abnormal, supae ag mga kabaean

Hep may una pa no…

Maduea pa baea ro mga gwapa ag gwapo.

Sa kalokohan supaean ag wakaean

Kami gid ro unahan

Pero pag pinanisgan it maestra o maestro

Mahipos gid ro seksyon molave karon .

Pero bisan makaron kami

Kahidlawan n’yo gid kami

Dahil kami manlang ro seksyon molave

Nga bisan inyong ginaagtunan

Palanggaon n’yo man gihapon kami it mae-mae.

Ni SHALLEN MAE M. FERNANDEZ

Melchor Memorial School Inc.

Laguinbanwa, Ibajay, Aklan