Leah D. Dumalaog

VIVA IBAJAY!

Di ko gid pag-ibaylo

Ang banwa nga baeo

Maskin siin maglingot

Sa Ibajay man gihapon ang buot.

Ati-ati kimo nag-umpisa

Ikaw ro unang singgit it hala bira!

Kimo eamang kami masadsad

Bangud sa Sto. Niño kami gapanaad.

Viva Ibajay!

Ikaw ro among baeay

Ikaw ro among hayag

Kimo ro among hibayag.

ni Leah D. Dumalaog

Aklan State University

Ibajay Campus

Sharlene J. Mandin

PAYAG NGA MAHILWAY

Pag-uli ko halin sa eskuylahan

Magaoy ro siki, pati ro kaisipan

Gusto ko magpahuway-huway ag magpahilay-hilay

Sa manami ko nga payag ag mahilway.

Sa managob nga gab-ihon it akong pagkatueog

Ako hay nagangawa, ham-an ang payag hay maeahog

Ginahuyong, ginahuyop it hangin ro uean nga mabaskog

Nagbangon ako ag nagpamuyot, eaom ko hay linog.

Gintangda ko ro pawod nga gin-eopnan ni Tatay

Nakita ko ro karton, kakon gapamaypay

Ro tubi gailig, sa haligi gaeatay

Ako hay nagtangis, basi maguba ro payag ko nga mahilway.

Saeamat sa Diyos, nga ro uean nagpundo

Pangamuyo  it paka, owa Na gintao

Mabahoe nga pabor, dahil ako nagatuo

Nga ro payag ko nga mahilway, protektahan it Ginuo.

ni Sharlene J. Mandin

Aklan State University

Ibajay Campus

HANDUMANAN (3) ni Malayag

BUEAWAN NGA AKEAN

Eugta nga gineubngan it akon nga inunlan

Manaming kahayag akong ginbugtawan

Lugar nga manggaran akong ginbahuean

Ginapabugae ko probinsya it Akean.

Maghalin pa kato hasta eon makaron

Hay ikaw gihapon sa ang paminsaron

Indi gid magbag-o ro ang baeatyagon

Ikaw nagaeugad sang kaugalingon.

Bueawan nga Akean hay pagahaeungan

Haead hay bugana duna nga manggaran

Mga pumueuyo hay may pangitan-an

Pirming ginatatap ag ginahipigan.

Ikaw ginahandum nga mangin pageaom

Sa ulihing tyempo agud may maagom

Mga kamaeayran akong tinguhaon

Ag rong katawhayan hay pangamuyuon.

Saligan mo Akean di ka pagpabay-an

Akong padayunon nga akong huliran

Ro imong ugsaran ag imong ueohan

Hasta kamatayon mangin kaibahan.

Akong ipabugae sa bilog nga nasyon

Bueawan nga Akean nga abi-abihon

Sa tagipusuon akong palanggaon

Ag pasaeamatan kabuhing naangkon.

_________________________________________

ATI-ATI SA IBAJAY

 ( KATO AG KARA )

KATO...

Hugot gid ag himpit mga baeatyagon

Tuod nga panaad kada Ibayhanon

Santo Niñong diosnon hay pagadayawon

Naga Ati-Ati sa ngaea’t debusyon.

Matapos ro misa hay nagahinugyaw

Ag sa karsadahon, nagasayaw-sayaw

Nga nagasinadsad sa bilog nga adlaw

Ag ro Santo Niño, taw-an it pagdayaw.

Nagahibo’t buling, eawas ag uyahon

Agud nga magsadsad sa may karsadahon

Nagapangamuyo, pangayo’t bendisyon

Ag makahinuesoe sa saeang naangkon

Gasinggit it “Viva” sa Mahae nga Niño

Inasae nga haead, eukos, alimango

Isda, mga karne, pasayan ag sugpo

Panaad nga hantop, sa isip it tawo.

KARA...

Tanang mga tawo kon imong tueukon

Kunimo matuod nga naga debusyon

Naga Ati-Ati, sa ngaea’t tradisyon

Apang buko’t hantop, mga kabubut-on.

Owa nagadam-os, buling sa uyahon

Mga nagasadsad, kunimo bugaeon

Gabuyot it bote nga mga ieimnon

Nagasuray-suray sa kahilungon.

Maeain ro tuyo sa isigkatawo

Bangud mga buyog eon ro mga ueo

Nagaaeayatan, inaway sa kanto

Owa nagapati sa tawo’t gobyerno.

Ngani siin baea ro pagtueuohan

Nga kita gahaead atong kapistahan

Señor Santo Niño ‘di eon kinahangean?

Bangud nagaeugad mga kayawaan!

CCP LAUNCHES SILVER EDITION OF ANI THIS NOVEMBER

• Awards
• Links
• Organizations
• Publications
• Workshops
• Writers Market
• About Us
• Guestbook

The Cultural Center of the Philippines (CCP) through its Intertextual Division celebrates the 25th anniversary of its literary journal by launching Ani 37, the Cleansing and Renewal issue, on November 29, 2012 at the CCP Promenade at five in the afternoon. Ani 37 contains 122 works of prose and poetry submitted by 66 authors written in English, Filipino and different Philippine languages, representing Aklanon, Bikol, Chabacano, Ilokano, Iluko, Kankanaey, and Pangasinan.  

“The prose and poems in this issue are metaphors of self-awareness and transcendence, and reflections on relationships with the Other, with mortality/immortality, with nation/country, with cultures local and international – and engagements with ideas on history, governance, civilization and consciousness,” wrote editor-in-chief and Intertextual Division chief Herminio S. Beltran, Jr. in the literary journal’s introduction.

The Ani 37 contributors include Conviron Altatis, Mark Angeles, Alma Anonas-Carpio, Billy T. Antonio, G. Mae Aquino, Carlos A. Arejola, Francisco Arias Monteseña, Mark Joseph Z. Arisgado, Abdon M. Balde, Jr., Maria Leah Baroña-Cruz, Ronald Baytan, Gil S. Beltran, Herminio S. Beltran, Jr., Kristoffer Berse, April Mae M. Berza, Letty Cantal-Pagkalinawan, Mark Gil M. Caparros, Nonon Carandang, Paul Castillo, Jose Jason L. Chancoco, Joey Stephanie Chua, Melchor F. Cichon, Mar Anthony Simon dela Cruz, Denver Ejem Torres, U Z. Eliserio, Johann Vladimir Espiritu, Raul Esquillo Asis, James M. Fajarito, Luis P. Gatmaitan, Genaro R. Gojo Cruz, Cristino Iloreta Inay, Sr., Io Mones Jularbal, Levine Lao, Junley L. Lazaga, Elyrah Loyola Salanga-Torralba, Nestor C. (Librano) Lucena, Elynia S. Mabanglo, Francis C. Macansantos, Maynard G. Manansala, Perry C. Mangilaya, Shur C. Mangilaya, Neoli Marcos, Donna Patricia Nuguid, Gexter Ocampo Lacambra, Wilhelmina S. Orozco, Melba Padilla-Maggay, Chuckberry J. Pascual, Honesto M. Pesimo, Jr., Ferdinand Pisigan Jarin, Lila Ramos Shahani, Vicente R. Raras, Rommel Rodriguez, Christopher S. Rosales, Hope Sabanpan-Yu, Scott Saboy, Louie Jon A. Sanchez, E. San Juan, Jr., Fely Senido, Jojo G. Silvestre, Priscilla Supnet Macansantos, Ariel S. Tabag, J.I.E. Teodoro, John Enrico C. Torralba, Betty Uy-Regala, Rachel Valencerina Marra, and Santiago B. Villafania.

During the launch, some of the contributors will be performing their work. Ani 37 will also be sold at a discounted price in the launch. 

PAGTUNOD IT ADLAW ni Mama Diva

Indi mahawiran ro atong paggueang

Kaparis ko adlaw nga nagataliwan

Masunod ro gabii, madueon, mahawan

May daeang kasubo ag mga kamingaw.

Kon akon isipon haeos di mabaton

Eawas nga mapagsik, maeuya makaron

Apang ro matuod dapat nga taeopangdan

Ag pasaeamatan nga buhi pa gihapon.

Ro kabuhi naton owa nagabato

Umpisa nga kita sa kalibutan natawo

Maghalin sa eapsag hasta pag-ulitawo

Mangasawa kita ag dayon mangapo.

Kada bahin it atong kabuhi

May mga inagyan, espesyal, pinasahi

Mga handumanan nga indi mapali

Sa atong tagipusuon ag atong kinabuhi.

Mga handumanan nga indi malipatan

Nagatao it yuhom ag kalipay sa dughan

Ngani bisan ro edad naton nagagueang

Owa’t basoe, owa’t nuoe, sa nangin kapalaran.

Ngani ro adlaw dapat gid matunod

Sa pag-aeaw-aeaw it agahon nga masunod

Ikaw, ako, kita tanan magaeuhod

Sa Dios magpasaeamat, magdayaw ag magtahod.

_________________________

GUGMA

Gugma ro nagtuga it sangkatawohan

Gugma ro nagpali it atong kasae-anan

Gugma ro nagpukaw it tagipusuon it tanan

Gugma ro nagapatiyog it atong kalibutan.

Owa’t ginapili ro gugma kon umigo

Halin sa pana nga pinaeupad ni kupido

Nalipatan ro mga problema ag prinsipyo

Dughan ro masunod bago piniino.

Kon nagahigugma kulay rosas ro palibot

Mahawan ro daean bisan puno’t tunok

Manamit ro suea ginamos man o dayok

Basta sa imong alima ako nagabuyot.

Ro mga tigueang bisan gakatunod

Apang ro tagipusuon nagahueag, nagatibok

Hilway man sa paghigugma agud may kaupod

Sa paghueat it oras nga kabuhi hay maupos.

ni MAMA DIVA

Liga ng mga Barangay

Ibajay, Aklan

MAEAS-AY NGA MATAM-IS (3) Mga Haiku ni Boboy

BORACAY

1.

Baeas it Boracay

Ginapabugae’t Aklan

Dapat amligan.

2.

Baeas sa long beach

Sa barangay Balabag

Nagapueoti.

3.

Gaeupad-eupad

Ro kabug sa Bolabog

Owa’t hapunan.

4.

Gakaya-kaya

Sa maeamig nga baeas

Ro bayeng hubeas.

5.

Gapinaniid

Haeo sa anang buho

Indi kaguwa.

6.

Gaeangoy-eangoy

Mga isda sa eawod

Nagakinupag.

7.

Ginadinueag

Mga kabug sa kuyba

Nagtaeaeaas.

8.

Ginainusoy

Mga sapat sa taeon

Nagkaeaduea.

9.

Ginubang bukid

Sa ulihi nga adlaw

Ro pagdaeanas.

10.

Halin sa barko

Mga eanang nagtueo

Gaeutaw-eutaw.

11.

Matsa sungka eon

Mga eapok sa patag

Sige ro backhoe.

12.

Mga dueonan

Gin-aeagawang eugta

Nagkueuearan.

13.

Mga Tumandok

Sa ieistarang eugta

Ginpinaeayas.

14.

Mga ueagan

Sa nightlife it Boracay

Makaieibog.

15.

Nagaeinupad

Mga uwak sa Yapak

Ginadinueag.

16.

Nagahimunong

Mga kaeag sa Hagdan

Ginakinutkot.

17.

Nagakinamang

Mga kuray sa bibi

Nagainumang.

18.

Nagapinueaw

Mga tawong hagaeon

Mga panueoy.

19.

Nagasininggit

Mga ueagang baknit

Sigeng panamit.

20.

Nagawinarang

Sa nagob nga gabii

Ro mga adik.

21.

Nagapanglingling

Sa dueom it gabii

Ro mga mueto.

22.

Nagavideoke

Nagakaeantang matsa

Huma it baka.

23.

Nagkaeaeuka

Kahoy sa kagueangan

Ginabinuldos.

24.

Nagkaeapusa

Mga bato sa bibi

Ginatiniltil.

25.

Nagkaeaduea

Eugta it mga Ati

Ginpinamuoe.

26.

Nagkaeatup-ay

Mga eapok sa bukid

Sige ro loader.

27.

Owa’t nabilin

Nga ieistarang eugta

Ro Boracaynon.

28.

Owa’t mahimo

Mga tawong Tumandok

Sa dumueuong.

29.

Pirming einupok

Kapin eugtang sinueod

Nga no tresspassing.

30.

Ro dumueuong

Owa it patugsiling

Sa madaeasa.

31.

Ro mga amu

Sa tunga’t kagueangan

Nagkaeamusdok.

32.

Ro mga bang-aw

Pageanaag it dueom

Nagabinanghoe.

33.

Ro mga maoy

Owa’t untat ro inom

Nagawinakae.

34.

Ro mga pispis

Nga nagaeupad-eupad

Owa’t hapunan.

35.

Ro tunga’t eawod..

Sa sangag it water sports

Owa eo’t euta.

36.

Ro mga Ati

Owa’t mapanilungan

Gataeang-taeang.

37.

Ro mga hilong

Mga euspad ro mata

Nagaeinugad.

38.

Ro mga Ati

Owa’t pae-at ro obra

Gasueuguon.

39.

Ro rock formation

Ginhakeupa’t semento

Nagtaeaeabid.

40.

Sa kabukiran

Balingka ag kamote

Nagbaeantikon.

41.

Sa bar ag disco

Mga ueagang baye 

Nagapinueaw.

42.

Sa bibi’t baybay

Nagaeutaw-eutaw eang

Dinagsang eay-on.

43.

Sa dunang manggad

Ro mga dumueuong

Owa it hakat.

44.

Sa may jetty port

Cagban sa Manoc-manoc

Gapinaeusot.

45.

Sangkurong eugta

Ginpatueua’t dugo

Gin-aeagawan.

46.

Sa tunga’t isla

Tubi sa liong-liong

Nagaieitom.

47.

Sihi sa bibi

Ginpabugae it Yapak

Nagkaeapusa.

48.

Tawo sa isla

Nga nagasueubeangan

Owa’t kilaea.

 49.

Tubi sa bibi

Nagaeain ro kulor

Ginaeinumot.

50.

Ueagang baknit

Gasinaot sa disco

Hagae ag sueok.

TRIBU IT AKEAN (TANAGAKEANON ni ATI-ATI)

AKEAN 1

Ikaw akong huliran

Pinalangga kong Akean,

Eugta nga gineubongan

It akon nga inunlan. 

AKEAN 2

Saligan mo gid Akean

Indi ka pagpabay-an,

Tatapon ag haeongan

Agud may handumanan. 

AKEANON 1

Bugae ko nga Akeanon

Akong kaugalingon,

Kahayag nga naangkon

Hasta sa kamatayon. 

AKEANON 2

Akon nga palanggaon

Kasimanwang Akeanon,

Sa bilog natong nasyon

Akong abi-abihon. 

UEAN 1

Hueaw man anay hueaw

Agud taw-at einugaw,

Gatangis ro tagasaw

Owa kaliaw-liaw. 

UEAN 2

Bunok man anay bunok

Agud taw-an it eunok,

Sa may puno it nunok

Gasiluko ro manok. 

UEAN 3

Ro akab nga si Tomas

May bandera sa eanas,

Iguon it dimalas

Pirme eang nga gaugtas. 

UEAN 4

Ro gailig nga tubi

Owa it makabali,

Kon eab-on man it suli

Eagi-eaging gapali.