ni Anacel B. Cabales

UEAN

Kat ako hay owa it buot

Pirme nga bilin ni nanay ag tatay

Sa uean indi gid magsueay

Magtinir gid sa sueod it baeay.

Pero sa akon nga pagbahoe, ako hay may natukiban

Manami gali magsuey sa ueanan

Ag eabi ko pa gid naapresyar dahil sa espesyal nga kaibahan

Nga nagapaligos sa gabunok nga uean.

Samtang nagasayaw-sayaw ag nagadaeagan-daeagan

May akong napan-uhan ag nabinag-binagan

Nagbaylo eon gali ro akong panan-awan

Kanami gali rong pamatyagan

Sa idaeom it nagabunok nga uean.

Apang ro uean owa magbuhay

Kon siin ako eon hay nagakalipay

Gulpi nga naduea ag nagtawhay

Ham-an ako gin-aywanan, ay ahay!

Uean... Uean... Uean...

San-o magabalik kay ginakahidlawan

Ako hay uhaw nga ikaw sa uman mabatyagan

Kalipay nga daea kakon hay tuman.

Sa makaron ginatueok ko rong kaeangitan

Kataas gid rong silak ni haring adlaw

Owa gid it patimaan nga makita ka euman

Pero padayon nga nagaeaom nga maabot ka it uman!

_____________________________

PAILAYA

Ako hay nagbugtaw it aga-aga pa

Para magpanakayon sa baryo it Minaa

Mabug-at nga karga ro akong daea-daea

Sueod hay baeon it sang simana.

Sa akon nga pagsangdo sa baryo it Aparicio

Manami nga pag-abi-abi ro nabatian ko

Maayad-ayad nga pag-abot ma’am, ro andang pagmueo

Nalipay gid ako sa harang mga tawo

May nagdawat it prutas nga akong nahangaw-an

Kabahoe nga saging nga kara ko eang nasamitan

Indi man sab-a, indi man tundan

“Tingaea” gali ro anang pangaean.

Ag sa amon nga pagbaktas ako hay napahanga

Maagyan abung lukot-lukot ag mga orkidya

Maeamig nga tubi ag malimpyo pa

Berdeng kabukiran manami sa mata.

Ngani sa daeagko nga mga bato kami anay nagpundo

Indi para magpahuway kundi para magpalitrato

Manami gid nga yuhom ro binuy-an ko

Handumanan sa unang pag-agto.

Maeayo man, gaoy indi mabatyagan

Tungod sa manami nga mga ginagyan

Ag ako nakaabot sa akong ginaagtunan

Para magturo sa mga unga, agud mag-aeam!

ni Anacel B. Cabales

_____________________________

BONSAI AKEANON Mga Binaeaybay ni Roan

PAALIN EON KITA?

Babe, paalin eon kita?

Gustuhon ko man nga iteks ka

Indi ko maubra.

Kon imong ibusla kon ham-an baea?

Isipon ko pa eang

Nga may palangga ka eon nga iba.

Dughan ko gapiot eot-a

Matsa mamatay ako sa kalisod ngara!

Pero di ta man ikaw mabuslahan

Bangud sayod ko nga saea ko man

Akon ikaw ginpabay-an

Nga sa iba ro paagtunan.

Gusto ko man ikaw nga apinan

Sa mga nagakontra sa atong pagpinalanggaan,

Pero alinon ko kon indi sanda kimo tanan.

Gustuhon ko man nga ikaw hawiran

Pero sobra gid akong nalilisdan

Sa aton ngarang kahimtangan.

Mahae ko, sobra ta ikaw nga ginakahidlawan!

Sa akong disisyon nga nahuman

Kunta ako imong maintindihan,

Nga ikaw akong paeayuan.

Bisan masakit iya sa akong dughan,

Owa ako it mahimo kundi maghimud-os eon lang!

_________________________

IKAW AG AKO EAMANG

Diksyunaryo ka baea?

Bangud gintaw-an mo it kahueogan ro akong kabuhi.

Ngani nahambae ko, saeamat Manunuga ko.

Sa manami mo nga regalo.

Dahil kon iya ka sa akong euyo,

Pamatyag ko kumpleto gid ako.

Kon nadumduman mo pa

Tag una kang nakilaea.

Nainisip ko kon siin ta eon nakita?

A, nadumduman ko

Ikaw rong baye sa akong mga damgo.

Ag sa pag-abot mo, maabu ro nagbag-o.

Sa pitong buean nga ikaw nakaibahan,

Tuman nga kalipay ro akong nababatyagan.

Napupun-an mo rong kakueangan,

Nga iya sa akong dughan.

Pati mga problema ko hay nalilipatan.

Anghel ka halin sa kahitaasan,

Nag-abot para ako hay buligan.

Para mabuoe harang mga kahungkagan,

Di baea indi mo ako pag-aywanan?

Palangga ko, ako hay kaeuy-an.

Pangako hasta sa katapusan,

Ikaw ag ako eamang.

_________________________

TUMAN NGA KASUBO

Ginakaugtan ko nga rong kamingaw

Sa akong tagipusuon nagaabot.

Nasayran mo baea kon ham-an?

Bangud hara rong mga inoras nga sobra tang ginkahidlawan.

Gusto ko makita ka ag makaibahan.

Mga pagkupkop mo akon nabatyagan,

Ag mabatian nga mga tinaga mo nga puno it pagpalangga.

Pero hara tanan hay imposible eon nga matabo.

Maskin gustuhon ko man nga lipatan ra tanan,

Pero paano kon tagipusuon ginapangita ka,

Tungod kada piyungon ko ro akong mga mata,

Uyahon mo ro akong nakikita.

Ro hiyom mo kakon nga tama gid katam-is

Malipatan ko gid baea?

Ag rong mabahoe ko nga pangutana,

Ham-an pareho natong nabatyagan

Nga palangga naton rong kada isaea?

Kon indi malang puydi magkadayunan kita.

Ag harang kamingaw ginabatyag ta

Kunta owa ko lang ikaw nakilaea.

Mahae ko, tuman gid kasubo atong nadangatan ngara

Kalisod batunon nga ikaw nahaeayo eot-a.

Apang imo gid nga pakatandaan,

Indi ta pag ibaylo bisan kay sin-o man.

Iya sa akong dughan, pagpalangga ko kimo

Tubtob sa katubtuban.

_________________________

PAGHANDURAW

Ako nagapungko ag nagaisaeahanon

Ginahanduraw ko ro atong kahapon.

Kato ikaw ag ako sobrang malipayon

Pero karon gakasubo gid harang tagipusuon.

Nadumduman ko pa

Ro mga adlaw nga kita magakita.

Dughan ko kabaskog gid rong humba

Nga makita ka akong palangga.

Tuman gid nga kahidlaw ro akong ginabatyag

Kueang rong mga inoras nga kaibahan ka.

Kon puydi eang punggan ag papunduhon ra

Nga sa tupad ko makaibahan pa.

Kon ano ako kamalipayon sa imong euyo

Haron man kasubo nga mauli eon ako.

Sobrang kamingaw gid ro akong ginabatyag

Kaeuya gid it akon nga eawas.

Pero karon palangga ko ginakahidlawan ka

Gustuhon ko man ikaw makita

Ugaling di ko masarangan sumpaon it akong pamilya

Mahae ko, ako hay patawara!

_________________________

OWA NAPANINDUGAN

Sa idaeom kita it parehas nga eangit

Parehong hangin rong ginaginhawa

Nagakabuhi sa sangka planeta

Ngani ikaw ag ako puydi gid katama.

Mga hambaeunon mo nga ginahipigan

Iya sang isip pati sa tagipusuon man

Ginapakamanggad ag ginahaeongan

Indi ko gid malipatan tubtob sa katubtuban,

Abu man nagakundinar sa atong pagpalanggaanay.

Imposible man sa andang panan-awan

Bukon naton it kaapin rong bilog nga kalibutan

Apang aton napamatud-an nga rong Makaako

Kaibahan naton sa atong pagmaeahaean.

Owa ko man napanindugan ro atong ginsumpaan

Pero ako nagaeaom nga sa pilang adlaw

Nga ikaw ag ako magakita it uman

Para mapadayon ro napae-at nga pagmaeahaean.

_____________________________

TANGDAA

Eangit nga ginatueok

Hay eangit man nga ginatan-aw mo

Ako nagayuhom ag sa dughan ko may nagtubo nga handum.

Kunta maabot ko rong kaeangitan

Agud akong masueatan

Kung ano kadaeom it ang pagpalangga ko kimo Lorriane.

Nga sa imong pagtangda hay imong mabasahan

Ag imong masayran

Nga owa ta ginakalipatan

Ikaw eamang iya sa akong dughan.

Bisan siin ka man karon

Ibutang sa imong tagipusuon

Yari lang ako palangga ka sa gihapon.

Sa kagab-ihon

Samtang napainu-ino nga imaw suguon

Nga kantahon, mga paborito tang ambahanon

Agud atong handurawaon

Mga masinadyang anadlaw naton.

Bisan siin ka man karon

Ro eangit ag ro una sa kaeangitan

Sobrang makapadumdom

It atong pagmaeahaean!

- ROAN G. SUAREZ

Estancia, Kalibo, Aklan

TUMANDOK NGA AKEANON Mga Binaeaybay ni Ka Julio

RO AMON NGA SUEA

I.  PAMAHAW...

Manamit kan-on ro einap-uhang daehog

Ag isawsaw sa maaslum nga eanggaw,

Nga binutangan it katumbae nga kutikot.

Nagataeabilis man gali ro hueas sa uyahon

Ag nagahapu-hapo sa kabueusgon.

Manamit man ro sinanlag nga kalampay

Nga ginpanikop sa kanae ag kanalitas.

Ag ro pinamaehang tilapya, gurami ag puyo,

Nga ginpamunit sa may liong-liong.

Kapin pa gid ro inud-urang eugsok

Nga nadawi kabii sa tagon sa sapa.

Kapin tinguean ag maeamig ro tyempo,

Hay manami magpamahaw it nasambit

Nga mga kanamiton nga mga suea.

II.  ILABAS...

Manami man kon makabungkag kami

it gango sa suba ni Tatay.

Kapin bag-ong hubas ro baha.

Sigurado gid nga maabong sueod ro taon.

Makasamit euman it eab-as

Nga sinabawang ilongan, bae-a, bagtis,

Eawag, daeapingan ag ubog,

Makasamit euman it mayos ag daeagko

Nga mga ueang nga einupsan ni Nanay

It puso it saging, kapaya, tagabang

Ag payukan it maeapuyot.

Makahambae ka gid nga isaea

Sa pinakamanamit nga suea

Nga nasamitan nga gindat-on sa ilabas

III.  IHAPON...

Makaieibog gid-a ro pantat nga inihaw

nga amon nga sinag-ahan sa may tamburong.

Mananam man ro inasae nga haeuan,

Nga nadawi sa panagon sa sapa.

Manamit man ro nadawi sa eawig nga sili

Ag pinamaehan sa payok it maeapuyot.

Kamayaron man mageaha si Nanay

It adobong tangkong nga ginpanueaon sa libuo.

Manamit man ro sabaw it bangsod ag tingadlaw

nga ginpueot namon it sangmahapon sa suba.

Maayad-ayad ro akong katueogon sa gabii

Kon makaeamon it kanamiton nga ihapon.

IV.  PAGPASAEAMAT

Maskin adlaw-adlaw hay makaron nga mga klaseng suea

Ro akong ginakaon, hay owa gid it pagkasumo ro akong ginhawa.

Basta may eamunon eang gidlang una nga makapaumpaw

Sa akong ginabatyag nga kaibog ag kagutmon

Ag samtang nagahaead ro akon nga ginbugtawan ag ginbahuean

Nga baryo it mga kanamitong suea, hay padayon gihapon

Ro among maayad-ayad nga pagpangabuhi it matawhay.

Ag padayon man gihapon ro akong mga ginikanan

Sa pagpatikasog nga magpangadhap it mga suea nga among eamunon.

Agud padayon kami nga nagakabuhi sa bukon it maeain nga paagi.

Indi ko gid pag-ibaylo maskin pa sa maeahaeon nga mga suea

Ro amon nga mga ginakaon nga owa gid ginabakea,

Kundi ginausoy eamang sa kahugod it akon nga mga ginikanan.

Ayawan eon eani ako it pinanamgo nga makasamit man kunta

It mga maeahaeon nga klaseng suea nga kamahaeon bakeon.

Pero alinon naton hay imaw ro akong naabutan sa pangabuhi.

Kon ano eang ro una nga ginhaead, hay atong batunon ag kaunon.

Bangud sa kanamit nga mga suea nga ginaeinaha

Ag ginadat-on ni Nanay, hay mabaskog ro akong talig-ab

Nga nagahugom it pageaom ag makahambae ka gid...

“Saeamat gid nga abu, sa Imong grasya nga gintao, Ginuo!”

- JULSH M. MASANGCAY

(Kasimanwang Akeanon )

_____________________________

TATLONG BINAEAYBAY

1. BULAG

Owa nana ginatan-awa ro mga kahimtangan

It nagapangalisod nga mga imoe nga pumueoyo.

Owa nana ginatueoka ro mga nagabinalikutot

Ag nagabinakintoe it kabug-at sa pagpangabuhi.

Indi nana makit-an ro mga pag-antos it mga pobre,

Ro matsa bukid eon nga nagakaealhit nga higko,

Ro mga paturin ag supae nga mga unga sa karsada,

Ro mga buyug ag ueagan nga mga baknit nga

Nagawarang-warang sa karsadahon sa tungang gabii.

Owa gid imaw it makit-an nga kahayag sa kalibutan.

Matuod baea nga owa gid imaw it panan-awan?

O nagapakuno-kuno eamang imaw nga bulag?

Agud may kabangdanan baea nga owa gid kasayod

Sa mga kaeainon nga nagakaeatabo sa palibot.

O, basi ginbulag eamang imaw it madamoe nga kwarta.

2. BUNGOE

Owa gid imaw it nasayuran sa mga pakitluoy

It mga tawong nagasinggit it bulig ag nagapatabang.

Owa imaw it nabatian nga mga pagkinuliit

It mga nagaantos it kalisod nga mga tawo.

Indi nana mabatian ro mga sinangag sa palibot

Nga nagawinakae nga nagahinyo nga panabaon

Ro presyo it eana ag mga baeakeunon.

Ro mga inuwang it mga eapsag ag mga unga

Nga nagamaeasakit sa eugban it iskwater.

Ro mga tinangis it mga ginikanan nga kinakunyag

Sa kakueba, kahadlok, kasubo ag kagutmon.

Ro mga andar it mga daeagko nga mga saeakyan

Nga nagapinaguwa it maitom ag mahigko nga asu

Ro mga hugong it mga chainsaw ag bulldozer

Nga nagapinutoe it mga kahoy sa kagueangan.

Ro andar it loader ag mga daeagkong trak

Nga nagasinandok ag nagahinakot it baeas

Sa binit it maeubog ag nagataeang nga suba.

Ro mga nagaieinaway nga mga tawo nga owa

It untat sa pagpinaeupok ag pageinagamak

It mga makamaeatay nga armas sa kabukiran.

O, basi nagapabungoe-bungoe eamang imaw,

Agud may kabangdanan nga owa imaw kabati

Sa mga nagakaeatabo nga pag-antos it mga tawo.

3. APA

Owa gid imaw it mahambae sa mga nagakaeatabo

Ag ginahimo it mga nagapungko sa sueod it gobyerno.

Owa imaw nagasugid it kamatuoran sa mga nasayuran

Nga kamaea-maeahan sa mga nagabuyot it gobyerno.

Indi nana mahambae ro matuod-tuod nga baeatyagon,

Ag indi nana mamitlang ro anang buot hambaeon.

Ginapunggan eamang nana ro anang sakit it buot

Nga nagatipon sa anang maeamig nga tagipusuon.

Ginabinag-binag eamang nana ro mga nagakaeatabo

Sa anang nagabinuyog nga painu-ino ag huna-huna.

Matuod-tuod ro anang baeatyagon ag pagkatawo,

Owa gid kana it mahambae nga nagapakuno-kuno.

Maskin owa imaw it limog hay padayon ro anang mayad

nga mga ueobrahon nga nagabulig sa isigkatawo.

Bukon it kapareho it pulitiko, nga puro eamang wakae,

Pero owa man it mayad nga inubrahan para sa mga tawo.

- Julsh M. Masangcay

(Kasimanwang Akeanon )

MAEAS-AY NGA MATAM-IS 2 ( Mga Haiku ni Boboy )

ASAW-ASAW

Kanipis-nipis

Mahinay kon magtueo,

Daea hay eagnat.

AYAM

Kapin magutman

Mabaskog kon eumahay,

Dapat gid busgon.

ATOG

Pukue sa bato

Gintabaan nga suba,

Abung paeangan.

BADYAWI

Ginpinamueot

Ag ginbueos sa holen,

Hampanga’t unga.

BAHAW-BAHAW

Nakakinamang

Gausoy it pagkaon,

Kapin gid tam-is.

BANAG AG GUTAW

Suea’t ilaya.

Matsa bahug it baboy,

Makaieibog.

BANGA

Maeamig-eamig

Ro ginsaeok nga tubi,

Eiemna’t pobre.

BANGATI

Matsa baeatong

Sa tunga’t kagueangan,

Lisod usuyon.

BINAKOE

Eaha nga manok

Nga hinuhu sa butong,

Kahumot-humot.

BUSOE

Initsang busoe

Sa mahumok nga eapok,

Nagkaeatubo.

DAHON

Pag-abot oras

Bisan inali’t kapyot,

Nagakadagas.

DISMAYO

Gulpi it tungli

Nadueaa’t ginhawa,

Owa’t animo.

EAMAY

Kon mageaay eon

Bisan inali’t tindog,

Nagakatungli.

EANGGAM

Nabdos nga eanggam

Sa pinukan nga niyog,

Nagakinupag.

EINAPAY

Sampunong gutaw

Payuka’t maeapuyot,

Suea sa bahaw.

GAEANG

Pareho’t mamis

Tanan nga nagaangkit,

Nagakulisong.

GANGIS

Ham-an gid baea

Mageapnaag ro dueom,

Nagatinangis?

GANGO

Tumpok nga liay

Bungkagon ag atason,

Baeay it isda.

HANGIN

Tueokon nimo

Ro mga daho’t kahoy,

Gahapay-hapay.

INTIYAMIS

Isot nga pispis

Kon magpueopanihoe,

Kunimo bahoe.

INUBARANG MANOK

Bisayang manok

Pinayukan sa ubad,

Eahang Akeanon.

ISDA

Ueo ag ikog

Manami nga supaon,

Makabaeakog.

KABAEAN

Owa kabatyag

Bisan alino’t bunae,

Gapinadungoe.

KABUHI

Atong kabuhi

Umaeagi gid eamang,

Nagakamue-ok.

KAMUROS

Humot ro hugom

Eai’t kulor nga bugas,

Mananam kan-on

KATUMBAE

Bungang mahaeang

Isot eang nga kutikot,

Makapaeuha.

KUEAGI

Makapaeuad

It eabod nga gadagkot,

Limpyo ro saeod.

LIGBOS

Owa kahapon

Pagkaaga balikdon,

Nagatueobo.

MADYONG

Ginadimalas

Sang mahapong pinungko,

Nagainugtas.

MAEAGBAK

Kunimo hugop

Manaba kon eumupad,

Maila dakpon.

NAMOK

Kunimo isot

Mahugmay kon mageupad,

Sakit ro tuslok.

MANANGGITI

Tuba sa kawit

Gintigis sa gatangway,

Makapaumpaw.

MARIA-MARIA

Kon mageuto eon

Manami gid supsupon,

Pagkaong taeon.

MUS-AN

Bag-o nga bukad

Gainisak nga isiw,

Ginadipara.

PAEAY

Timsog ro uhay

Katimgason ro uyas,

haum gaeabon.

PAKOE

Klase it saging

Nga manami ubaron,

Eupsa’t manok.

PALHI

Kon magpamunit

Owa ka hingan tukbi,

Makangangawa.

PANAGON

Tagon sa sapa

Bistahan sa agahon,

Dawi’t haeuan

PAMUNIT

Abung gatukob

Ro gintaw-taw nga bunit,

Nagkaeasangit.

PUGAD

Pinukang kahoy

Nagaitlog nga pispis,

Nagamueaka.

PUKOE

Gasampi anay

Sa may binit it suba,

Nagapueos-an.

SAESAEON

Kon mabuhayan

Kapin puston it tuktok,

Nagakataetae.

SAGING

Mahumok ka eang

Kunimo owa’t tugas

Kusog sa upas.

SANDATAN

Puea it ikog

Kon kan-ot masakiton

Makasueogmat

SUGAE

Pirde sa pusoy

Sa baeay nagwinakae,

Ingit ro ueo.

TAGBAEAY

Tawong gaistar

Maskin guba ro baeay,

Taw-it respeto.

TAWO AG KAHOY

Kabuhi’t tawo

Kamana gid it kahoy,

Nagakaeanggi.

TIKALON

Nagabinagrong

Gapaeanubrang sugid,

Makaaeapok.

TIKWI

Gaeupad-eupad

Tumabusok sa eugta,

Dumagit isiw.

TINUG-ON

Kon maanukan

Puydi nga hakiron,

Gaasu-asu.

TINUMKAN

Putos it dahon

Ro tinumok nga ueang,

Mahaeang-haeang.

TINUOM

Putos sa dahon

Nga sinugba sa baga,

Nanam nga suea.

TINU-TINU

Kon magsieilak

Sa tunga’t kaeanasan,

Pagkao’t unga.

TUNGAW

Kaisut-isot

Kon pumang-it sa panit,

Namit kaeuton.

TYEMPO

Samtang gaagi

Indi gid manigahan,

Nga nagabag-o.

UHOT

Ahaw nga uhot

Hueata nga maeunot,

Abuno’t eanas.

UPA

Ahaw nga upa

Kunimo owa’t pueos

Bahug sa baboy

UTANG

Dali maghueam

Kon magpanueoktan eon,

Gaueusoyan.

UTOE

Maniwang malang

Kon kumapyot sa panit,

Nagatinambok.

2nd Gig Book Storywriting Contest Semifinalists

2nd Gig Book Storywriting Contest Semifinalists

As announced earlier, we will identify 35 to 75 semifinalists of the 2nd Gig Book Storywriting Contest. Here is the final and complete list of 65 semifinalists arranged alphabetically by title. The final judging will select 10 winning stories which will be announced on or before 2012 March 31.

A Homecoming Plan For Papa
-----by Ma Cecilia C. de la Rosa
A Lesson From Grandma
----- by Gay Marie M. Francisco
A Promise To Remain Nice
----- by Jon Espera Royeca
A Talk With Dad
----- by Jon Espera Royeca
A Tiny Spark Of Hope
----- by Manuel Sebastian B. de la Cruz
A Tiny Wounded Heart
----- by Jennylyn Salazar Isherwood
A Wish To The Moon And The Gentle Wind Dragons
-----by Raymund Magno Garlítos
Alaminos
----- by Carmen Rosario D. Pérez
Anchor And The Sea
----- by Hernani P. Geronimo
Ate Ela: My Sister, Mother and Father
----- by Minerva Generalao
Badong And His Binoculars
----- by Leilanee Pilar M. Gabriel
Big Slippers
----- by Gay Marie M. Francisco
Concepcion's Last Voyage
----- by Al Ponciano R. Datu
Dadiangas
----- by Carmen Rosario D. Pérez
Dad's Gifts To Me, Aileen
----- by Georgina C. Solina
Dominic's Little Story Of Love And Forgiveness
-----by Jennylyn Salazar Isherwood
Enzo's Change of Heart
----- by Rebecca S. Gerodias
Hello, Tatay! by Genaro
----- R. Gojo Cruz
Hmmphh! Says Estong
----- by Raechelle Castellon
Homemade
----- by Anna Cristina Llanera-Reyes
I'm Rescuing Santa Claus
----- by Christian Q. Salta
Ishmael And The Ocean
----- by Franklin P. Andaya
Junior's Diary
----- by Carlo Baltazar Ventura
Just Like The Hornbill
----- by Katrina C. Vinluan
Lengleng And The Doll House
----- by Premy Ann G. Beloy
Lifebreak
----- by John Thomas P. Miranda
Lily's Butterfly
----- by Eric Goden Lomocso
Little Jimmy's Monthly Journal
----- by Jennylyn Salazar Isherwood
Mac Tan
----- by Carmen Rosario D. Pérez
Magic Box
----- by Liwliwa N. Malabed
Magic Rubber Shoes
----- by Mary Gigi Constantino
Man Of The Family
----- by Alpha Luz Napatang
Manuel's Name
----- by Michaela Sarah G. Deleon
My Dad And I Travel The World
----- by Francesca Cielo M. Ravanes
My Dad Cooks On The Sea
----- by Rhodora Householder
My Invisible Dad
----- by Perry C. Mangilaya
My Precious Man
----- by Florlynn L. Bassi
My Super Father
----- by Shur C. Mangilaya
Nesto's New Home
----- by Kathleen Aton-Osias
Papa And The Pirates
----- by Franklin P. Andaya
Papa And The Pirates
----- by Romeo A. Solina
Papa's Treasure
----- by Georgianna Reyes de Vera
Pido's Dream
----- by Eunice M. Chan
Pirate No Beard
----- by Georgianna Reyes de Vera
Postcards To Papa
----- by Raissa Claire R. Falgui
Postscript For Pio
----- by Mia Ayroso Buenaventura
Rock Star
----- by Gay Marie M. Francisco
Sailor Moon And The Jeepney
----- by Ruffa J. Sebuc
Smile!
----- by Ira Chloemn B. Daylo
Sonny Boy And The Sun
----- by Jose Dennis C. Teodosio
Sula, The Sailor's Child
----- by Catherine Rose G. Torres
The Captain's Lost Son
----- by Eric Goden Lomocso
The Mermaid Sister
----- by Celestine Marie Gaspar Trinidad
The Sea Prince
----- by Nina Sheryll V. Palad
The Seafarer's Glasshouse
----- by Heidi Emily Eusebio-Abad
The Sirens of Sarah
----- by Emerson F. Bengco
The Story Of Billy The Bully And Mic The Meek
-----by Adrian John O. Ladaga
The Stranger At My Door
----- by Gail Christiane Te
The Woman In Daddy's Wallet
----- by Fernando R. Gonzalez
We Grew Up Without A Father
----- by Ariel Gaspi
What's Inside A Turtle's Shell?
----- by Raymond G. Falgui
When Papa Went Away
----- by Irma Arcega Celis
When Would Papa Arrive
----- by Jose Ma. Marko O. Sevilla
When You Are Away
----- by Bella Charina Alexandra D. Mercado
Will Papa’s Red Truck Ever Come Back?
-----by Weneven Nierra Caberte

HANDUMANAN ni Malayag (2)

BUEO-BUEO

Sa isaea ka simple ag maeayong barangay,
Ro mga tahur hay nagkaeangay;
Sa buoe-bueo nga mag-engkwentrohanay,
Agud matigayon ro andang kalipay.

Sari-saring agak ro mga gindaea,
May mistisuhon, bisaya ag dirasa;
May alimbuyog, talisayon ag puea,
Maskin owa ngani it daea nga kwarta.

May paring nga likusan,
May binabaye nga senyalan;
May tukong nga koronahan,
May bulag nga banderahan.

May gapanukoe nga baeayon,
May hulo nga tibakon;
May bantres nga galiton,
May ati nga burunguson.

May nagkaeasugot sa sieikaran,
Eagi-eagi sanda hay nagtaeakdan;
Ro manugpusta hay nag-aeamutan,
Ag ginplastar sa gabuyot it muntonan.

Ro talisayong manok hay natama sa biya,
Ag ro agaw hay puea bangud abong pusta;
Madali eang pagyamar ag eagi ginpalarga,
Eagi-eagi nadayon ro una nga sultada.

Ro mga tahur hay nagsieinggitan,
Dyes-syite, ag baynte-kinse hasta ro lugrohan;
Ro mga kristo hay nagpueustaan,
Ag nagkaeasugot sa sieinyasan.

Pagsinggit it larga it mahugod nga yamador
Eagi-eagi nag-alerto ro sintensyador
Ginbuy-an ro manok it daywang sultador
Ag nagpueoekan ro daywang ganador.

Apang nagsinangag tapos it engkwentro,
Owa nagkaeasugot ro pilang mga kristo;
Bangud kuno hay disyaon ro pagkareyo,
Ro sintensyador hay nadangat sa peligro.

Ro nagpueostaan hay nagsinueoktan,
Apang ro ginbayad hay sieinggitan;
Nagsaeabtanan hasta nagtinueoepan,
Nag-aeakiran hasta nga nageinagsan.

Ro mga pulis hay nag-aeabutan,
Ag eagi-eagi hay nagdinaeakpan;
Ro ibang tahur hay nakadaeagan,
Apang ro iba, ginsueod sa kulungan.

Ro bueo-bueo hay malisod gid nga bisyo,
Ag ginabawae gid it atong gobyerno;
Bangud bukon abi it lisensyado,
Ngani magpae-at eon it sugae nga peligroso.

------------------------------------

PAHID

Sa banwa it Ibajay, sa baryo it Yawan,
May ginhiwat nga binaylehan;
Nagtaeambong ro mga kadaeagahan,
Ag nagbaeayle sanda it kamirunan.

Sa pagbaligya it basket nga panganay
May nagbakae nga grupo kuno it mahilway;
Apang ginpasakaan it grupong manugtangway,
Ngani ro mahilway sa pagbakae nagpahuway.

Sunod nga ginbaligya hay basket nga pangaywa,
May nagbakae man nga grupo nga manugbaesa;
Ag nagsaeaot sa gwapahon nga mga daeaga,
Ro mga nagbakae hay nagkalipay sa plasa.

Naghinyo ro grupo nga ilisan ro sonata,
Ag ginpatukar ro barok nga matsa cha-cha;
Ro grupo hay nagsaot it pahid ag nagkinaransa,
Ag nagkinasadya kaibahan ro partner nga daeaga.

Gintawag pa gid nanda sa mataas nga presyo
Agud makabulig gid kuno sanda it husto;
Ro alas tres nga oras eagi hay gin anunsyo,
Agud tapuson eon ro pagpangita it negosyo.

Ngani manami gid ro pagpabenipisyo,
It mga mahugod nga nagapanirbisyo:
Mabahoe nga bulig para nga mag-asenso,
Sa isaea nga maeayo ag pobre nga baryo.

ni Malayag

ni P.M. Conanan

Pagbinag-binag sa Panumdoman it Isaea ka Binukot


Pinili mo nga magpanaog sa syudad.
Einayasan mo ro ginharian nga ginhaead kimo it kadunaan.
Gintalikdan mo ro imo nga pagkaprinsesa.
Gaoy eon ro imong huna-huna ag gusto eon nimo nga mahilway.
Ginuba mo ro maimon nga kalinong.
Kalinong nga nangin kahulid nimo sa kada adlaw ag gabii.
Ginpili mo nga mataeupangdan ro kataason it eangit.
Dangawon ro kaeaparan it eugta. Ag taw-an
it hayga ro imong mga panikangon.

Hangaway ka nga eumutos sa syudad.
Idto sa mga aninong nagatabuk-tabok sa karsadahon
it mga nagabaeansuli nga kadudoeman, samtang nagaaeawayan
ro mga mueto sa entablado ag ginakunyag ro tungang gabii.
Sa syudad nga indi magpamati sa mga nagapangayo it tabang
samtang nagawinakae ag nagawaeas ro mga tawo sa nagapinueaw nga karsadahon...

Idto sa nagapanghuy-ab nga mga rebulto.

Nangin ginharian mo ro kuta
nga ginapueawan it mga budli nga tiyan.
Sa nagapangayat ag hagae nga sonata.
Nagapanampit ro makahieilong nga mga ieimnon.
Samtang nagatinamboe ro mga tukar nga makabueungoe.
Ag ginaeag-ok ro imo nga nagaeutaw-eutaw nga kaeag.
Nahidlaw nga nagaeinagatik ro maeamig-eamig nga mga baso.
Nagaeaway ro mga buesa sa kada saot it hubeas nga eawas.
Makahieilong ro mga nagaliraw nga kahayag it iwag
ag ikaw hay nahilong...

Hilong nga hilong.

Nahilong ka sa kabuganaan nga haead it ginharian nga kueang
sa manggad, manggad nga haead kimo it kadunaan.
Eumunip ka ag naeumos sa purilon nga syudad.
samtang ginapas-an mo sa panumdoman ro imo nga kahapon.

Ginhawanan mo ro daean agud balikdan ro eandong
it imong ginbugtawan nga ginharian. Agud samitan
euman ro kabuganaan nga haead kimo it kadunaan.

Apang tabu-tabuhon ag batsihon eon ro daean
paagto sa gintalikdan nimo nga ginharian...

ni P.M. Conanan
Manila