MAEAS-AY NGA MATAM-IS ( 5 ) Mga Haiku ni Kasimaryo

MAEAS-AY NGA MATAM-IS ( 5 )

Mga Haiku ni Kasimaryo

________________________________

AGA-AGA

Maeamig-eamig

Ginahaead it tun-og

Bag-ong kabuhi.

AGAHON

Nagapadumdom

Ro pagsipeak it silak

Bag-ong pageaom.

ANWANG

Nagahinugod

Nagabulig sa tawo,

Makaeueuoy.

ATI-ATI

Nagahinugyaw

Haead sa Sto. Niño,

Grasyang inasae.

BAEANGAW

Makangangawa

Naduea ro sampihak

Einamo’t eawod?

BAEOD

Paagto’t bibi.

Owa’t untat nga tubi

It dinaguso

BAEU

Nagpailawod

Daean nga pailaya,

Nagkaeataeang.

BANGHOE

Gabiing dueom

Nagaaeaging tawo,

Nagakaduea.

BINUKOT

Si Maria Clara

Ro imong kaparehas

Bayeng maeumhing.

BUNGKOE

Kon pakaunon

Owa it kabueosgan

Sueok sa suhoe.

DAEUGDOG

Makabueungoe

Ag nagapatimaan

Pagtueo’t uean.

DAHON

Pag-abot oras

Bisan inali’t kapyot,

Nagakadagas.

EANGGAM

Nabdos nga eanggam

Sa pinukan nga niyog,

Nagakinupag.

EUSO-EUSO

May daeang kueba

Ro pag-asik it uean

Sa gubang payag.

GANGIS

Ham-an gid baea

Mageapnaag ro dueom,

Nagatinangis?

GOBYERNO

Kwartang gakalhit

Swerte it nagapungko

Makapamueot.

              

HANGIN

Imong tueokon

Ro mga daho’t kahoy,

Gahapay-hapay.

KABUHI

Atong kabuhi

Umaeagi gid eamang,

Nagakamue-ok.

KAGUTMON

Nagpinamueot

Mga pagkaong salin,

Kasapin-sapin..

KANAWAY

Nagahagiyos

Ro baeos it kanaway

Bahang madaeom..

KURING

Matsa maeuya

Itsaha’t gulpi

Pagtugpa kaya.

MANAKAW

Gapinamatyag

Sa dueom it gabii,

Bantay it euta.

MANANGGITI

Tuba sa kawit

Gintigis ag einag-ok

Makapaumpaw.

MANGGAD

Buganang grasya

Taw-an naton it hayga

Sa nagahueam.

MALIIT

Tawo sa taeon

Indi gid pagdueaga,

Halit ro baeos.

                

PAGDANGOP

Isigkatawo

Nga gapangayo’t bulig

Taw-an it hayga.

               

PAGHINUESOE

Makasasaea

Gaabot sa ulihing

Pagpahanumdom.

PANIMAD-ON

Haeambaeunon

It mga ginikanan

Pagaandaman.

PANUEOY

Tungang gabii

Sapat nga gahueoni

Nagapinueaw.

PAYAG

Paeahuwayan

Gin-antos nga kabudlay

May katawhayan.

PUGAD

Pinukang kahoy

Nagaeumeom nga pispis,

Nagamueaka.

PULITIKO

Nagapromisa

Manami nga proyekto,

Tawong purilon..

SILOM

Sa pageapnaag

Kadueom sa palibot.

Dapat magtagam.

TAEAGBASAN

Nagadinaeom

Samtang ginahalikap

Makahieilab.

TAGBAEAY

Tawong gaistar

Bisan guba ro baeay,

Taw-it pagtahod.

TAWO

Kabuhi’t tawo

Kamana gid it kahoy,

Nagakaeanggi.

TYEMPO

Samtang gaagi

Indi gid manigahan,

Nga nagabag-o.

UEOD

Ro pobreng ueod

Mahinay kon maghiod

Nagahimueat.

UGSAD

Bilog ro hayag

Kon maagyan it gae-om,

Nagakaduea.

UMAE

Maskin bairon

Kon ‘di maghimatuon

Indi magdueot.